Shaka pa kripë e tre të rinjve në bllok, policia në alarm

Loja e tre të rinjve ka alarmuar njerëzit në zonën e ish-Blokut dhe ka vënë në lëvizje forcat speciale të policisë të shtunën mbrëma.
Të rinjtë, dy djem dhe një vajzë, ishin duke bërë xhiro me automjetin e tyre BMW. Njëri nga djemtë kishte vendosur në kokë një kapuç të ngjashëm me ata që përdoren për grabitje, i cili i mbulonte edhe fytyrën.
Duke qenë se makina bëri rreth dhjetë xhiro në këtë zonë të frekuentuar të kryeqytetit, pamja e të rinjve ngjalli dyshime te policia, e cila u vu në alarm. Katër skuadra “Shqiponja” u vunë në ndjekje të BMW-së. Pasi rrethuan mjetin, efektivët “Shqiponja” shoqëruan të rinjtë në polici. Pas verifikimeve rezultoi se ata nuk kishin bërë asgjë të paligjshme, thjesht kishin zgjedhur një mënyrë të gabuar për të tërhequr vëmendje.
Lëvizja e automjetit me djalin e maskuar ngjalli shqetësim edhe mes kalimtarëve. Kjo provohet edhe nga burimet e policisë, të cilat bëjnë të ditur se te numri 129 kanë ardhur rreth 15 telefonata denoncuese.
Zyrtarisht, Policia e Tiranës bën të ditur se rreth orës 20:30 të mbrëmjes së djeshme, shërbimet e skuadrës “Shqiponja” kanë konstatuar në lëvizje një mjet tip BMW, ku drejtuesi kishte vendosur një maskë. Ky mjet krijonte shqetësim te banorët në zonën e ish-Bllokut. Të njëjtat burime thanë se menjëherë u bë ndalimi i mjetit. Drejtuesi, shtetasi R. Shehu, ishte me maskë në kokë në momentin e ndalimit dhe në brendësi të mjetit ndodheshin edhe dy shtetas të tjerë.
Nisur nga dyshimet se ky drejtues mjeti me fytyrë të mbuluar mund të kryente ndonjë vepër penale dhe me qëllim parandalimin e ndonjë ngjarjeje të mundshme, u bë shoqërimi i tij për sqarimin e rrethanave në mjediset e Komisariatit të Policisë Nr. 2. Në polici u shoqëruan edhe dy të rinjtë e tjerë që ndodheshin në të njëjtin mjet. Gjatë kontrollit të mjetit nuk janë konstatuar sende të jashtëligjshme. Po punohet për sqarimin e rrethanave të mëtejshme, sqarojnë zyrtarisht të njëjtat burime.
Të shoqëruarit janë: R. Shehu, 24 vjeç; K. Nasko, 23 vjeç dhe A. B., 18 vjeçe, që të tre banues në Tiranë.