Kryeministri Edi Rama ka reaguar kundër zgjedhjes së kryetarit dhe zv/kryetarit të Akademisë së Shkencave.
Rama i quan farsë këto zgjedhje dhe thotë: “Meqë “Akademia” zgjodhi farsën uroj të gjejnë dhe fondet për vijimin e farsës!Fondet tona do t’i shkojnë universitetit për kërkim shkencor”.
Më herët gjatë ditës së sotme, Kryeministri Edi Rama deklaroi se Akademia e Shkencave duhet të reformohet, në të kundërt nuk do të ketë fonde dhe do të duhet të dorëzojë ndërtesën.
***
ZGJEDHJET NE AKADEMINE E SHKENCAVE
Akademia e Shkencave të Shqipërisë mbajti sot zgjedhjet për kryetarin dhe zëvendëskryetarin e ri.
Pas numërimit të votave të 29 anëtarëve të Akademisë, të cilët morën pjesë në proces, Gudar Beqiraj u zgjodh kryetar i Akademisë së Shkencave. Beqiraj u zgjodh me 28 vota pro dhe 1 kundër.
Kryetari i ri i Akademisë së Shkencave nuk kishte asnjë rival në këtë garë. Ndërsa zv/kryetar i ASH u zgjodh ish-kryetari, Myzafer Korkuti. Kështu, Beqiraj dhe Korkuti këmbejnë vendet me njëri-tjetrin në postet kyçe të Akademisë së Shkencave.
Zgjedhjet në Akademi nxitën mjaft reagime brenda akademikëve dhe jo vetëm, pasi njëra palë kërkoi transformim rrënjësoj kundrejt palës tjetër në “pushtet” që kërkonte të rikonfirmohet në detyrë.
Një ditë më parë, Akademiku Artan Fuga i ka bërë thirrje gazetarëve dhe drejtuesve të mediave të vëzhgojnë dhe raportojnë atë që ai e quan “katrahurën e 4 shtatorit”, pikërishit zgjedhjet në Akademinë e Shkencave.
Fuga i ka quajtur këto zgjedhje “farsë zgjedhore”, “për krizën e thellë të kërkimit shkencor në Shqipëri, dhe që është mekanizmi që mbulon faktet që tregojnë se Akademia e Shkencave, por jo vetëm ajo, nuk është në pozicionin e duhur, në ritmin e duhur, në gjallërinë e duhur dhe në rezultatet e duhura!”
Sipas Fugës, në Akademinë e Shkencave nuk bëhet fjalë për garë zgjedhore, por për një farsë e cila synon të mbrojë status quon-në e atyre që sot janë në pushtet në ASH.
Votuan 29 akademikë
Morën pjesë në votim 29 akademike. Dy anëtarë të Akademisë së Shkencave, Aferdita Vevecka dhe Ylli Popa janë ndarë nga jeta.
Ndërkohë, Artan Fuga nuk ka pranuar ftesën e ASH dhe për rrjedhojë nuk do të votojë. Ai i ka cilësuar zgjedhjet farsë dhe jo një proces që synon reformimin e Akademisë së Shkencave.
a.ç
