“Risia e këtij sezoni është rritja me disa herë e numrit të turistëve të cilët vijnë nga vende europiane dhe e gjithë bota dhe ne jemi përgatitur t’i presim jo vetëm me standarde cilësore, por me kalendar festash që janë 500 gjatë sezonit turistik” – tha ministri i Turizmit dhe Mjedisit, Blendi Klosi gjatë inaugurimit sot të një hoteli me pesë yje në Golem.
Më tej Klosi shtoi se kë të sezon pritet rritja me disa herë e numrit të turistëve, të cilët vijnë nga vende europiane dhe e gjithë bota.
“Kemi ndryshuar tashmë numrin e pasaportave që hyjnë në kufirin shqiptar duke i shtuar më shumë vende të reja që nuk kanë qenë më parë si, Izraeli, Danimarka, Norvegjia, Britania e Madhe”, – shtoi ai.
Po ashtu, Klosi tha se me rritjen e turistëve rritet përgjegjësia e qeverisë për cilësinë e turizmit shqiptar për ta shndërruar atë në një turizëm me shumë alternativa.
“Prandaj ne ju bëjmë thirrje këtyre operatorëve që janë këtu, të kthejnë sytë nga turizmi alternativ, të kemi mundësi t’u ofrojmë turistëve një numër shumë më të madh mundësish për të vizituar bregdetin dhe jo vetëm, për të shkuar me një kalendar festash që janë 500 gjatë sezonit turistik dhe i kemi organizuar në të gjithë vendin nëpërmjet tri institucioneve, Ministrisë së Turizmit, Ministrisë së Bujqësisë dhe Ministrisë së Kulturës”, – tha Klosi.
/b.d
