Blerja e re e Juventusit, Aaron Ramsey, është vlerësuar si një “goditje e madhe” nga ish-ylli i Italisë, Franco Baresi. Ky i fundit nuk ka asnjë dyshim për uellsianin e Arsenalit, nëse do të përshtatet me jetën dhe futbollin në Itali.
Ramsey do të përfundojë eksperiencën 11-vjeçare me “topçinjtë” dhe do të kalojë te kampionët e Serie A kësaj vere. Mesfushori ka rënë dakord për një kontratë 4-vjeçare me bardhezinjtë dhe do të bashkohet me lojtarë si Cristiano Ronaldo, Paulo Dybala, Giorgio Chiellini dhe Leonardo Bonucci.
Baresi e sheh këtë lëvizje si të shkëlqyer për klubin torinez, që ka dominuar Serie A në pothuajse dekadën e fundit. “Unë e kam parë atë duke luajtur. Pa dyshim, është një lojtar i madh, – tha ish-mbrojtësi kuqezi. – Personalisht mendoj se Juventusi ka bërë një goditje të madhe me të. Jam i sigurt se do të jetë në gjendje të përshtatet me futbollin italian”.
Baresi, i cili fitoi gjashtë tituj të Serie A, kishte lëvdata për transferimet e Juventusit, por legjenda e Milanit po shpreson, gjithashtu, që dominimi bardhezi në Itali të mos zgjasë shumë. Ish-skuadra e tij gjendet 24 pikë prapa “Zonjës së Vjetër”, në vendin e katërt të klasifikimit aktual, por shpreson kualifikimin në Ligën e Kampionëve për edicionin e ardhshëm:
“Juventusi e ka pasur nën kontroll Serie A në vitet e fundit, kështu që mbetet të shihet se çfarë mund të bëjnë ekipet e tjera. Ato duhet të rriten. Interi, Roma, Milani, Lazio dhe Napoli duken në këtë drejtim, për momentin. Kualifikimi në Ligën e Kampionëve do të ishte shumë i rëndësishëm për Milanin, këtë sezon, sepse sjell para, mundësi për investime dhe shanse për t’u rritur”.
/a.rada
