Hamdi Salihi, ashtu siç ishte parashikuar përpara nisjes drejt Serbisë, do të kthehet në kohë rekord në fushën e lojës.
Këto janë lajmet e mira që kanë mbërritur gjatë ditës së djeshme nga Serbia, atje ku prej 3 ditësh shkodrani është duke kryer terapi intensive nën kujdesin e serbes së famshme, Marjana Kovaçeviç.
Informacionet që kanë mbërritur dje për Salihin, kanë qenë vërtet pozitive. Mësohet se tërheqja që ka pësuar në kofshën e djathtë është e një shkalle më të lartë se e Latifit, por do të duhen gjashtë terapi gjithsej dhe Salihi do të jetë më pas gati.
Tri terapitë e para për lojtarin kanë përfunduar dje, ndërkohë që në mbrëmje vonë pritej që shkodrani të bënte edhe eko-n, përgjigje që do të jepet sot dhe të mësohet se deri ku ka shkuar rikuperimi i lojtarit. Kanë mbetur, sipas serbes, edhe tre terapi të tjera dhe më pas Salihi nesër në mbrëmje vonë do të niset drejt Shqipërisë për t’u bashkuar me Skënderbeun.
Sipas asaj që shkruan “Sport Ekspres”, për ndeshjen e së enjtes ndaj Beshiktashit, Hamdi Salihi mund të mos jetë 100% gati, por që lajmi që do të rikthehet në kohë rekord ka gëzuar absolutisht drejtuesit e Skënderbeut dhe stafin teknik.
Ndoshta të enjten mund të mos rrezikohet për sulmuesin, por të hënën, si sot një javë më vonë, ndaj Tiranës, Salihi do të jetë 100% gati. Një rikuperim që do të vijë absolutisht në kohë rekord dhe kjo ka ardhur edhe falë presidentit Ardjan Takaj, që ka shpenzuar shumë për të kthyer lojtarin sa më parë të jetë e mundur në fushën e lojës. Kujtojmë që një terapi një orëshe që zgjat me serben Marjana kushton 500 euro dhe ashtu siç ishte parashikuar, vetëm terapitë kushtojnë 3 mijë euro, por që për presidentin nuk janë asgjë përpara rikthimit në kohë rekord të lojtarit.
