Nga Mentor Kikia
Këtë fundjavë serbët dëshmuan atë që ne e dinim, që janë një popull dhe shoqëri e prapambetur. Dhjetra mijëra njerëz dolën në rrugët dhe sheshet e Beogradit. Kërkojnë largimin e presidentit Vuçiç. E akuzojnë se ia ka dorëzuar pushtetin oligarkisë, ka blerë mediat dhe ka ngushtuar demokracinë.
Në epokën e teknologjisë, dhe në kohën kur ne shqiptarët edhe autostradat i ndërtojmë në kompjuter, ne versionin 3D dhe vetem i printojmë, serbët nuk kanë as facebook, as twitter dhe dalin në protestë si në mesin e shekullit të kaluar. Kishin marrë madje edhe fëmijët me vete, duke shkelur konventat për të drejtat e fëmijëve, dhe për të dëshmuar se e keqja trashëgohet nga njëri brez në tjetrin.
Ndërsa këtë fundjavë ne treguam klasin tonë civil dhe qytetar. Në respekt të të drejtave, ne fëmijët tanë i çuam të shëtisnin e të argëtoheshin. Tek “Toptani” nuk kishte vende parkimi, tek TEG duhej një orë të kalojë rrethrrotullimin. Madje, më thanë se edhe tek Shaba në Vishnje, që bën mish në saç, nuk kishte vende parkimi.
Dhe, ndërkohë që psonisnim e hanim, ne protestonim në mënyrë të qytetëruar në “versionin 3 D”, në facebook. Hidhnim foto, video, statuse, citate, meme, deklarata, bënim share, like, zemra të kuqe, shanim qeverinë, shanim opozitën (por më shumë shanim njëri-tjetrin). Dhe në fund arritëm në përfundimin që kjo qeveri e ka mbaruar misionin e vet dhe largimi është thjeshtë çeshjte ditësh. Por, se sa ditë, këtë nuk e kemi përcaktuar akoma.
Ndërkohë, një grusht njerëzish, ca emigrantë, ca studentë, ca artistë, ca minatorë e ca qytetarë aspak të qytetëruar, ishin mbledhur para kryeministrisë, në një përpjekje të dështuar për të na prishur imazhin tonë civil.
Madje pashë edhe një burrë që kishte djalin “kala-qafë”, që donte të imitonte modelin serb. Por kjo mbeti një përpjekje e izoluar, pasi në dëshmuam se jemi një shoqëri e kulturuar.
Tani të mos e zgjasim, të nisim protestën në fb edhe sot, në ditën e fundit të vitit:
Unë mendoj se qeveria është e korruptuar. Opozita është e paaftë dhe pa alternativë, ndaj duhet të ikin të dyja.
Kush është dakord të bëjë “Share”.
Të bëjmë 1000 “Share” që të largohet Rama. Ose 1001 që të iki edhe Basha.
Të bëjmë 100.000 “Like”, për inat të serbëve. Tregojeni veten që jeni shqiptarë. Po mundët bëni edhe shqiponjën me duar, por kjo nuk është kusht.
