Nga Nard Ndoka
Kushtetuta, ligji, institucionet, shteti, pavarësia, decentralizimi janë terma, që për klasën politike janë vetëm fjalë.
Ne i zgjidhim punët dhe… konfliktet me dhunë fizike, verbale dhe me forcën e pushtetit.
Para disa viteve, kur Rama qeveriste Bashkinë e Tiranës, fitoi simpatinë e shumë qytetarëve me stilin e tij impulsiv dhe të drejtpërdrejtë.
Të gjithë e kujtojmë kur mori sëpatën në dorë, dhe goditi një shtyllë që i kishte zënë rrugën reformave të tij. Ai akt i pëlqeu se u mireprit nga qytetarët.
Ishte një gjest, një akt revoltues ndaj institucioneve dhe dikastereve tona, që nuk reagonin në kohë, apo më keq akoma, që donin ta pengonin kryebashkiakun në rrugën e tij, duke ja lënë ‘shtyllat’ në mes të rrugës.
Rama në atë kohë përcolli një shqetësim qytetar dhe të institucionit që drejtonte, e shkundi opinionin, e goditi shtetin që nuk funksiononte me sëpatë.
Për kohën atëherë, e debatueshme si zgjidhje, por për realitetin e pranueshëm si sjellje me nuanca ‘europianizuese’.
Pse Rama e mban edhe sot sëpatën ne dorë?
Se ai nuk arriti të krijojë një profil kushtetues europian, por mbeti një politikan ballkanas, që problemet dhe konfliktet nuk i zgjidh me kushtetutë, por akoma me ‘sëpatë’ në dorë.
Rama sot, e ka në dorë tĕ largojë shtyllën nga rruga, por ka zgjedhur të godasë me sëpatĕ, tashmë jo shtyllën, por qytetarët që i prekin shtyllën.
Ky stil tashmë është kthyer në institucion, ‘rilindja’, tĕ godet me sëpatë kur ajo e gjykon se duhet.
Godet opozitën, godet Presidentin, godet Gjykatën, godet qytetarin edhe kur ai nuk e ka mendjen tek qeveria. Rilindja është pushtet me vete mbi të gjitha pushtetet, rilindja është ‘djalli’ vete.
Sepata e Rames është i vetmi pushtet, që jep drejtësi te pavarur, të drejtë, të shpejte, efikase dhe vetëm me një të goditur.
Ç’farë na duhet Presidenti, ç’farë na duhet opozita, ç’farë na duhen një tufë gjykatash?
Një kosto e madhe, burokraci, shpenzime, fjalë, pengesa, ndërsa sëpata e Ramës asnjë kosto, në duar të sigurta jep vetëm garanci dhe besim! Shpresoj që edhe me ambasadorin Lu dhe gjithë të tjereët tu tregoje ‘sëpatën çudibërëse’ dhe mos te na çajnë kokën me reformën e panevojshme në drejtesi. Rilindja sëpatën po e perdor tashmë gjithandej, me referendumin në parti, nuk goditen kutitë me sëpate, por Blushin.
Madje edhe Shukriut të partisë i janë bërë copash brekët e grisura me sëpatë.
Të merresh vesh sot në politikë është shumë e vështirë, të negociosh është humbje kohe, të gjesh konsensus është dëshpëruese, të respektosh kushtetutën dhe institucionet është rrugë shumë e gjatë dhe jo drejtimi i duhur!
Rrofte rilindja, rrofte sëpata e Ramës!
Fundja Rama e ka referencën “populli shqiptar e ka çarë rrugën e historisë me shpatë në dorë”, ka thënë Enveri.
