Brigitte Bardot mbetet në qendër të polemikave edhe pas ndarjes së saj nga jeta. Në Paris do të nxirren në ankand rreth 300 objekte personale të ikonës së kinemasë franceze, një vendim që ka shkaktuar kundërshtimin e bashkëshortit të saj të fundit, Bernard d’Ormal.
Shitja organizohet nga shtëpia e ankandeve Millon, në Hotel Drouot, dhe përfshin sende e veshje të përdorura nga Bardot. Në listë janë kapelet prej kashte që ajo mbante shpesh, një tutu e zezë, bereta, produkte të kujdesit personal, të brendshme dhe këpucë baleti të markës Repetto.
Objektet janë ruajtur ndër vite në apartamentin e aktores në Paris, si edhe në La Madrague, rezidenca e njohur buzë detit në Saint-Tropez. Bardot e bleu këtë pronë në vitin 1958, pasi u bë e famshme me filmin “Dhe Zoti… Krijoi Gruan”.
Bernard d’Ormal, 85 vjeç, e ka kundërshtuar publikisht ankandin, duke e konsideruar një akt pa respekt ndaj kujtimit të bashkëshortes. Ai ka vënë në pikëpyetje arsyen e shitjes, duke pyetur nëse ajo po bëhet “për kafshë”, dhe e ka cilësuar vendimin qesharak e skandaloz. Sipas tij, sendet duhej të ruheshin për një të ardhme kur njerëzit do të mund të vizitonin La Madrague, ndërsa mënyrën e shitjes e ka përshkruar si zhveshje të Brigitte Bardot nga kujtimet e saj.
D’Ormal beson se Bardot nuk do ta kishte miratuar një veprim të tillë. Ai ka deklaruar se, në vend që të pranonte shitjen, ajo do t’i kishte hedhur sendet.
Sipas mediave të huaja, ankandi synon të sigurojë të ardhura për Fondacionin Brigitte Bardot, i krijuar nga aktorja për mbrojtjen e kafshëve, si edhe për djalin e saj 66-vjeçar, Nicolas Sarrier. D’Ormal ka ngritur shqetësimin se në të ardhmen mund të shiten edhe pronat e Bardot në Saint-Tropez, La Madrague dhe La Garrigue. Për mediat franceze, ai ka thënë se ka jetuar atje për 35 vjet dhe se tani po e dëbojnë, duke shtuar: “A mund ta besoni?”.
Brigitte Bardot u nda nga jeta në dhjetor, në moshën 91-vjeçare. Ajo dhe Bernard d’Ormal kishin qenë së bashku për rreth 30 vjet. Martesa e tyre fetare u zhvillua në Norvegji në vitin 1992, por nuk u njoh asnjëherë si martesë ligjërisht e vlefshme në Francë.
Debati është shtrirë edhe te trashëgimia. D’Ormal nuk përfitoi pasuri nga testamenti i Bardot, megjithëse vetë ai ka thënë se i kishte bërë të ditur bashkëshortes se nuk dëshironte të trashëgonte asgjë. Nga Fondacioni Brigitte Bardot është pretenduar gjithashtu se 85-vjeçari ishte president i tij në momentin kur u miratua ankandi, akuzë që ai e mohon.
