Eduart Selami ka deklaruar se ai e kritikon udhëheqjen e Partisë Demokratike sepse dëshiron që ajo të funksionojë sa më mirë. Në një intervistë me Gazetën Shqiptare, ish-kryetari demokrat deklaron se mbështetet edhe nga kolegë të tjerë në kritikat e tij, siç ndodhi edhe në mbledhjen e fundit të grupit parlamentar, zhvilluar me dyer të mbyllura.
Selami nuk ishte në takimin e opozitës me Sekretarin Kerry, po thotë se mungesa nuk ka lidhje me kritikat ndaj Bashës.
“Nuk besoj se përbën interes për publikun nëse isha apo nuk isha unë në atë takim. Është e parëndësishme, krahasuar me një vizitë aq të rëndësishme sa ajo e një zyrtari të lartë të Shteteve të Bashkuara të Amerikës në Shqipëri. Nuk ka të bëjë me këtë (kritikat ndaj Bashës). Nuk dua të bëj komente të tjera, pasi nuk besoj se përbën ndonjë interes për askënd”.
Ai nuk jep hollësi për kritikat në mbledhjen e grupit, pasi i cilëson si çështje të brendshme, por thotë se shpreson që gjërat të shkojnë më mirë.
“Kam besim që po. Ndaj bëhen mbledhjet e grupit parlamentar, për t’i thënë gjërat aty sa herë që nuk shkojnë ashtu siç duhet, dhe gjithçka bëhet për mirëfunksionimin e partisë. Çfarë është e brendshme në parti, është e tillë brenda saj, dhe nuk dua që të bëj komente për atë çfarë u diskutua apo do të diskutohet në mbledhjet e tjera të grupit parlamentar të PD-së”.
BW
