Sekretari i Përgjithshëm i Organizatës së Kombeve të Bashkuara, António Guterres, të shtunën dënoi përshkallëzimin më të fundit ushtarak në Lindjen e Mesme, pasi Shtetet e Bashkuara dhe Izraeli ndërmorën sulme ajrore ndaj Iranit.
“E dënoj përshkallëzimin e sotëm ushtarak në Lindjen e Mesme. Përdorimi i forcës nga Shtetet e Bashkuara dhe Izraeli kundër Iranit, si dhe kundërpërgjigjja pasuese e Iranit në të gjithë rajonin, minojnë paqen dhe sigurinë ndërkombëtare”, tha Guterres në një deklaratë, përcjell A2 CNN.
Duke u bërë thirrje të gjitha shteteve anëtare të respektojnë detyrimet e tyre sipas së drejtës ndërkombëtare, përfshirë Kartën e Organizatës së Kombeve të Bashkuara, Guterres rikujtoi se Karta “ndalon qartë ‘kërcënimin ose përdorimin e forcës kundër integritetit territorial ose pavarësisë politike të çdo shteti, apo në çfarëdo mënyre tjetër që bie ndesh me qëllimet e Kombeve të Bashkuara.’”
“Bëj thirrje për një ndërprerje të menjëhershme të armiqësive dhe për de-përshkallëzim,” tha ai, duke paralajmëruar se “dështimi për ta bërë këtë rrezikon një konflikt më të gjerë rajonal, me pasoja të rënda për civilët dhe stabilitetin rajonal”.
“I inkurajoj fuqishëm të gjitha palët që të kthehen menjëherë në tryezën e negociatave”. shtoi ai.
Guterres theksoi gjithashtu se “nuk ka alternativë të qëndrueshme për zgjidhjen paqësore të mosmarrëveshjeve ndërkombëtare”.
