Sekretari i Përgjithshëm i NATO-s, Jens Stoltenberg, ka deklaruar sot se Aleanca është e gatshme për rinovimin e “bisedimeve konstruktive” me Rusinë.
“Ne nuk jemi duke kërkuar konfrontim me Rusinë, dhe dëshirojmë të parandalojmë mundësinë e një lufte të re të ftohtë”, ka shtuar Stoltenberg gjatë një konference për media në Bruksel, transmeton Telegrafi.
Ai megjithatë, ka shtuar se Rusia është “e gatshme të përdorë forcën ushtarake për të frikësuar fqinjët e saj evropianë”, si përgjigje ndaj zgjerimit të NATO-s në Lindje, si dhe po “riformon” kufijtë e Evropës.
Stoltenberg, ka theksuar se është e rëndësishme që marrëveshjet e Minskut të zbatohen plotësisht, për t’i dhënë fund konfliktit në lindje të Ukrainës.
