Feja islame në tërësi, e Komuniteti Mysliman në Shqipëri në veçanti, ka këmbëngulur vazhdimisht që terrorizmi të mos identifikohet me këtë fe e cila simbolizon paqen, duke e quajtur të gabuar termin “terrorizmi islamik”.
Por ndërsa të gjithë liderët, si politikë ashtu edhe fetarë, dënuan me forcë sulmet terroriste që tronditën Brukselin më 22 mars duke bërë të qartë diferencimin nga çdo akt i tillë, ka edhe persona që mendojnë se terroristët janë pasardhës të profetit Muhamed.
Bëhet fjalë për Genard Hajdinin, i cili për disa vite rresht ka kryer funksionin e Sekretarit të Përgjithshëm të Këshillit Ndërfetar të Shqipërisë.
Në një postim në rrjetin social Facebook më 22 mars, ditën kur bektashinjtë kremtuan festën e Sulltan Novruzit, Hajdini ka fyer fenë islame duke thënë se pasardhësit e profetit Muhamed janë armiq të cilët duhet të luftohen nga të krishterët, duke i bërë njëherësh përgjegjës për sulmet terroriste në Bruksel.
“Duke u lutur për Brukselin edhe nëpërmjet St. GUDULE (ose Shën Goedele) që të jetë i mbrojtur nga Jezusi, Biri i Perëndisë, kundër Muhammedit dhe pasardhësve të familjes së tij. Shqipëria e Shën Nënë Terezës (Agnes Gonxhe Bojaxhiu), në 4 shtator, 2016. Foshnja mashkull e Brukselit (statuja simbol) do të “pshurr” mbi terrorizmin islamik të ISIS dhe të tjerët si ai… Sepse në fund DASHURIA mbizotëron mbi Armiqtë e pasardhësve të Familjes së Muhamedit”, shkruan Hajdini në një status në gjuhën angleze.
Këshilli Ndërfetar i Shqipërisë është themeluar në tetor të 2009 nga katër krerët e komuniteve tradicionale në vend, Selim Muça, kryepeshkopi Anastas Janullatos, Imzot Rrok Mirdita dhe Haxhi Dede Reshat Bardhi, citohet “Gazeta Express”.
