Sekretari amerikan i mbrojtjes, Ash Carter takohet sot me homologët e tij të NATO-s në Bruksel për të diskutuar mbi planet për t’u përgjigjur ndaj veprimeve të Rusisë në Ukrainë.
Sekretari Carter është në Evropë për një turne njëjavor të përqendruar tek bashkëpunimi SHBA-Evropë përballë zhvillimeve me Rusinë që akuzohet se po ndihmon direkt separatistët në Ukrainë.
Moska mohon t’u ketë dhënë trupa dhe arme rebelëve.
Sot është e para nga dy ditët që Carter do të bëjë bisedime me ministrat e NATO-s.
Në komente në kryeqytetin e Estonisë, Talin dje, zoti Carter tha se Perëndimi nuk do që të bëhet armik i Rusisë, por nëse është e nevojshme do të vetëmbrohet.
Zoti Carter njoftoi dje se Shtetet e Bashkuara do të vendosin 250 tanke, dhe armë të tjera të rënda dhe paisje ushtarake në gjahstë vende evropiane, përfshirë shtetet balltike për të krijuar siguri tek aleatët e NATO-s përballë kërcënimeve nga Rusia dhe grupet terroriste.
Carter u tha gazetarëve se shtetet Balltike – Estonia, Lituania dhe Letonia – së bashku me Bullgarinë, Rumaninë dhe Poloninë kishin rënë dakord të pranonin elementë të atyre paisjeve. Ai tha se paisjet mund të lëvizin nga njëri-vend në tjetrin në rajon për stërvitje ushtarake.
Pasi Rusia ankesoi Krimenë vitin që kaloi, udhëheqësit e NATO-s ranë dakord të shtojnë stërvitjet ushtarake dhe rotacionet e forcave përmes aleatëve të NATO-s në Evropën Lindore dhe për të mbajtur atje paisje ushtarake për t’u përdorur në rast urgjence.
Pa dhënë detaje për vendet e dislokimit, zoti Carter tha se paisjet nuk do të ishin “statike” por kanë si qëllim “të bëjnë të mundur stërvitje më të kualifikuar dhe lehtësi lëvizjeje për forcat në Evropë”. Ai tha se prania amerikane, do të ishte “e vazhdueshme” por “elastike”.
Për të ndihmuar aleatët të zhvillojnë strategji mbrojtjeje ndaj sulmeve kibernetike, Shtetet e Bashkuara do të punojnë gjithashtu me qendrën kibernetike të NATO-s që ndodhet në Estoni, tha sekretari Carter.
Javën e kaluar, pasi u bë publik për herë të parë në shtyp plani i Shteteve të Bashkuara, një zyrtar i Ministrisë ruse të mbrojtjes u citua të thoshte se ky do të ishte akti me agresiv amerikan që nga Lufta e Ftohtë.
Po javës që kaloi, Presidenti Vladimir Putin deklaroi se Rusia do të shtonte mbi 40 raketa balistike ndërkontinentale në arsenalin e saj bërthamor të vitit 2015.
Zoti Carter tha në fillim të javës se nuk ekziston as ndonjë dëshirë për t’iu kthyer Luftës së Ftohtë, as për ndonjë konflikt aktiv me Rusinë. Ai tha se sanksionet po japin efektin e duhur duke shkaktuar vështirësi ekonomike për Moskën.
Po të hënën, Sekretari i Përgjithshëm i NATO-s, Jens Stoltenberg tha se aleanca do ta shtojë forcën e vet të ndërhyrje së shpejtë nga 13 mijë trupa aktualisht në 30 ose 40 mijë.
