Deputeti socialist Pjerin Ndreu ka hedhur akuza ndaj partnerëve të koalicionit të majtë, pasi sipas tij, segmente të caktuara brenda koalicionit punuan kundër Partisë Socialiste në zgjedhjet në Dibër
I ftuar në rubrikën “Opinion” në “News24”, Ndreu tha se segmente të koalicionit të majtë kanë luajtur një rol negativ në zgjedhjet në Dibër, por nuk ka saktësuar se për cilin segment apo aleat të PS-së bëhet fjalë.
“Unë do them atë që pashë unë. Segmente të caktuara të koalicionit kanë qenë kundër. Kanë qenë disa segmente që unë i kam parë, në Lurë. Rezervoj të mos shprehem. Segmente të koalicionit kanë luajtur një rol jashtëzakonisht negativ dhe kanë patur një qasje absolutisht në mbështetje të kandidatit të PD-së. Ky është mendimi im personal, nga konstatimi im personal dhe nuk kam përse mos ta them. Nëse koalicioni do funksiononte më mirë, rezultati do ishte edhe më i thellë.”- deklaroi Ndreu.
Sipas deputetit Ndreu, arsyeja e fitores së Muharem Ramës është zgjedhja e kandidatit të duhur dhe skema e organizimit të fushatës, e drejtuar nga ministri Gjiknuri.
“Ka qenë një skemë organizimi e mbështetur tek dibranët, pa importim njerëzish. Nga krahu kundërshtar kam parë mori njerëzish të mobilizuar nga të gjithë krahinat e Shqipërisë. Ishin dyndur në Dibër.”- deklaroi Ndreu./a.m.
