“Në partneritet për regjistrimin e fëmijëve në kohë” ishte takimi që u organizua sot në mjediset e Spitalit Universitar Obstetrik-Gjinekologjik “Mbretëresha Geraldinë” për shpalljen e një partneritet të ri të UNICEF-it me Telekom në mbështetje të Ministrisë së Shëndetësisë për përmirësimin e aksesit ndaj kujdesit shëndetësor Parësor për fëmijën në Shqipëri përmes inovacionit.
I organizuar në formën e një bashkëbisedimi me mjekë, infermierë e punonjës të sistemit të kujdesit shëndetësor, paneli i takimit përbëhej nga zj. Antonella Scolamiero, Përfaqësuesja e UNICEF-it në Shqipëri, z. Dimitrios Blatsios, CEO i Telekom Albania dhe Ilir Beqaj, Ministër i Shëndetësisë.
“Ne po përfundojmë zbatimin e një programi të madh që është gjithë platforma e Shëndetësisë Elektronike. Që do të thotë, një platformë ku do të ruhet dhe do të këmbehet informacioni shëndetësor individual.
Ndërkohë, në shërbimin tonë shëndetësor Parësor, praktikisht, brenda vitit, kemi një zgjerim shumë të madh të përdorimit të teknologjisë së informacionit dhe komunikimit, falë atyre që po zbatojmë, dhe që lidhen qoftë me Recetën Elektronike, qoftë edhe me Referimin Elektronik të vizitave. Dhe gjykuam, bashkërisht, që këtë oportunitet dhe këtë angazhim të Telekom-it, me rreth 100 mijë dollarë të fokusuar tek shëndeti i fëmijëve, pikërisht, ta shfrytëzojmë që të plotësojmë një copëz që e kemi ende bosh, që është transferimi i menjëhershëm i informacionit shëndetësor nga materniteti apo nga spitali ku fëmija lind, në qendrën shëndetësore parësore, duke e vendosur në platformën eDosjes Elektronike dhe Komunikimit Elektronik.
UNICEF-i na ndihmon në mënyrë të përditshme me furnizimin e vijueshëm të vaksinave, si një agjenci globale prokurimi. Dhe edhe falë kësaj ndihme, ne në Shqipëri kemi një shkallë vaksinimi goxha të mirë, mbi 98%.
UNICEF-i na ka ndihmuar për udhërrëfyesit e kujdesit neonantal edhe post-natal, dhe së fundmi, na ndihmoi edhe kur bëmë amendimet e ligjit të ushqyerjes me gji.
Unë jam i kënaqur sot që kësaj përpjekjeje i bashkohet edhe një kompani e madhe si Telekom. Sepse, tregon që këto kompani të mëdha janë të mira publike të vendit dhe zhvillojnë edhe ato përgjegjësitë e tyre sociale.”- tha Beqaj.
Partneriteti midis UNICEF-it dhe Telekom për të mbështetur Ministrinë e Shëndetësisë do të përdorë inovacionin dhe teknologjinë për të siguruar se të gjithë të sapolindurit të regjistruar në lindje të vazhdojnë të kenë akses të plotë në shërbime shëndetësore. Falë Telekom Albania, UNICEF-i në partneritet të ngushtë me Ministrinë e Shëndetësisë do të punojë për përforcimin e sistemit të informacionit shëndetësor për fëmijët në Shqipëri.
