Sara Hoxha po hap një faqe të re në rrugëtimin e saj televiziv, këtë herë duke marrë përsipër rolin e moderatores.
Prej të dielës, 20 shtator, ajo do të drejtojë rubrikën “Me Gjithë Zemër”, e cila do të jetë pjesë e programit “E Diell” në Top Channel.
Publiku e njeh Sarën edhe nga pjesëmarrja në “Dancing With The Stars”, ku u shpall fituese në krah të balerinit Luixhino Hala. Më vonë, ajo u bë pjesë e “E Diell” si anëtare e jurisë së rubrikës “She’s On Top”, ndërsa në vitin 2023 u shfaq edhe si aktore në filmin “Në Kuadër të Dashurisë”.
Me “Me Gjithë Zemër”, Sara rikthehet në ekran në një pozicion të ri. Rubrika do t’u kushtohet historive njerëzore dhe emocioneve, duke u dhënë njerëzve mundësinë të përcjellin falënderime, të kërkojnë falje apo të përgatisin surpriza për personat e tyre të dashur. Në këtë hapësirë priten gjithashtu momente të veçanta, si propozime për martesë dhe surpriza emocionuese.
