Ministrja e Ekonomisë dhe Inovacionit, Delina Ibrahimaj, deklaroi në Samitin e IV të Diasporës se Shqipëria ndodhet në një moment të rëndësishëm të rritjes ekonomike, ndërsa theksoi se vendi ka ende potenciale të pashfrytëzuara.
Gjatë fjalës së saj në panelin “Diaspora, partner në biznes dhe inovacion”, Ibrahimaj u shpreh se rritja e investimeve ka nxitur zhvillimin ekonomik, duke nënvizuar rëndësinë e kontributit të diasporës.
Ajo theksoi se me një plan konkret pune, pritet që në samitin e ardhshëm të ketë më shumë rezultate të prekshme krahasuar me të kaluarën.
“Vendi ka ende potenciale të pashfrytëzuara. Shqipëria është në një moment të rritjes ekonomike dhe investimet kanë ardhur në rritje dhe kanë nxitur edhe më shumë investime dhe zhvillim ekonomik. Investimet kanë më shumë vlerë nëse janë nga diaspora dhe shqiptarë që duan të kthehen dhe të investojnë në vendin e tyre, duke dhënë eksperiencën që kanë marrë nga jashtë si në inovacion dhe në sektorët kyç.
Duke pasur një plan pune konkret, jam e bindur që në samitin e radhës do të kemi më shumë rezultate konkrete se në të kaluarën. Një pjesë e portofolit të Ministrisë lidhet edhe me inovacionin dhe start up-et dhe kur filluam, kërkesat nga diaspora ishin zero. Në thirrjen e dytë patëm 5 startup-e që aplikuan nga diaspora. Vitin e kaluar ishin 35 shqiptarë që aplikuan, ndërsa këtë vit janë 70 shqiptarë që kanë aplikuar nga vendet e rajonit dhe diaspora. Ky mund të jetë një numër i vogël, por është domethënës dhe po vjen në rritje”, tha Ibrahimaj.
Ibrahimaj bëri të ditur se qeveria ka krijuar një fond të posaçëm për inovacionin, të dedikuar për diasporën, me synim jo vetëm tërheqjen e kapitalit dhe njohurive, por edhe mbështetjen e bizneseve për t’u ndërkombëtarizuar.
Ajo u ndal edhe te zhvillimi i turizmit, duke e cilësuar atë si një nga sektorët me rritjen më të shpejtë vitet e fundit, falë politikave lehtësuese dhe krijimit të një mjedisi të favorshëm për investime.
Ndërkohë, energjia u përmend si një tjetër sektor prioritar, ku Shqipëria synon të tërheqë investime të huaja dhe nga diaspora, veçanërisht në fushën e energjisë së rinovueshme dhe të gjelbër.
“Një fond i veçantë në inovacion është dedikuar diasporës nga qeveria. Ne duam jo vetëm të tërheqim kapital dhe njohuri nga diaspora, por edhe të ndihmojmë diasporën në biznes për ta ndërkombëtarizuar atë.
Edhe turizmi ka pasur një zhvillim të jashtëzakonshëm vitet e fundit dhe kjo ka ardhur në sajë të një vizioni dhe politike që qeveria ka zbatuar duke krijuar një mjedis lehtësues për rritjen e investimeve në turizëm.
Energjia është një sektor ku do të kërkojmë investime të huaja, por edhe të diasporës. Kur flasim për energji në vendin tonë, flasim për energji të rinovueshme dhe të gjelbër”, tha ministrja.
Paneli i organizuar nën kujdesin e Ministrisë së Ekonomisë dhe Inovacionit u fokusua në potencialin e diasporës shqiptare si një urë lidhëse për zhvillimin ekonomik, transferimin e njohurive dhe nxitjen e inovacionit.
