Presidenti i Bullgarisë, Rumen Radev, ka bërë thirrje që të përshpejtohet integrimi në Bashkimin Europian i rajonit të Ballkanit, bazuar në meritat e secilit shtet.
Në deklaratën përmbyllëse të Samitit të Evropës Juglindore që u mbajt në Tiranë, Presidenti bullgar u shpreh se vendi i tij do të punojë në këtë drejtim.
“Bullgaria merr sfidën e bashkëpunimit të procesit të Europës Juglindore. Unë do të doja t’ju garantoja që ne duke qenë për herë të katërt në kryesi, do të zhvillojmë jo vetëm atë që kemi arritur deri tani, por do bëjmë më të mirën për të zgjidhur të gjitha sfidat që ka rajoni ynë.
Bashkëpunimi është çelësi që rajoni ynë të zhvillohet si vend i sigurisë, stabilitetit dhe përparimit. Prioritetet e kryesisë do të synojnë pikërisht këtë, përshpejtimin e integrimit të rajonit bazuar në merita, përshpejtim të ekonomive tona, lidhjet ndërmjet njëri-tjetrit, si dhe kapitali njerëzor. Rajoni ynë mbulon 150 milionë qytetarë”.
Presidenti bullgar iu përgjigj edhe homologes së Maqedonisë së Veriut, e cila përmendi edhe bllokimin e negociatave të vendit të saj nga Bullgaria.
“Nuk po flasim për marrëdhënie bilaterale të pazgjidhura, as për një veto, por gjithkush e kupton që po flasim për shtetin e së drejtës dhe të drejtat e njeriut. Bullgaria është shteti më i afërt dhe ka dëshirën për të qenë ndihmë që shoqëria juaj dhe shteti të trajtojë sfidat në një mënyrë më të shpejtë. Dhe këtu në fakt bazohet miqësia. Që vendet e rajonit t’i bashkohen Bashkimit Europian. Bullgaria si një anëtar për një kohë të gjatë i BE, si dhe kryesuese e kësaj iniciative, është një vend që mendon në mënyrë aktive në politikën e jashtme. Bullgaria do të jetë një partner i përgjegjshëm”.
Shqipëria-Maqedonia e Veriut-Bullgaria janë 3 vendet ku do të kalojë Korridori 8.
“Ne jemi vendet që kemi Korridorin 8 dhe zhvillimi është i një rëndësie shumë të madhe. Do bëjmë të gjitha përpjekjet që ky korridor të përfundohet sa më shpejt të jetë e mundur”, përmbylli Presidenti i Bullgarisë.
