Deputeti demokrat Ervin Salianji, i vetmi përfaqësues i opozitës në mbledhjen e sotme të Këshillit të Legjislacionit për vetingun në politikë, ku u mbajt seanca dëgjimore me përfaqësuesit e biznesit, kërkoi përshpejtimin e procedurës.
Ai tha është e qartë se mazhoranca nuk e do vetingun e politikës dhe se qytetarët duan njëherë e mirë, sidomos pas zbulimit të ngjarjeve të lidhjes së politikanëve me krimin, që të shkëputen njëherë e mirë lidhjet e politikanëve me krimin.
“Ne si PD kemi kërkuar kontrollin e integritetit të politikanëve, të lidhjes së tyre me krimin dhe kontrollin e pasurisë së politikanëve. Nuk besoj se ka qytetar që nuk traumatizohet kur kryetar bashkie të zgjedhur nga PS thonë se ‘unë e njoh Niçen’ dhe na i shesin si normalitet”, u shpreh deputeti demokrat, duke iu referuar kryebashkiakut të Durrësit, Vangjush Dako.
Ai shtoi se ajo që opozita kërkon dhe që siç gjenden edhe në përgjimet e policisë, që të dënohen personat e përfshirë, njëlloj siç ndodhi me ish-deputetët e Partisë Socialiste.
Salianji kërkoi që të bëhet kontrolli i integritetit dhe pasurisë së politikanëve njësoj si me gjyqtarët dhe policët.
Sipas tij, nuk ka më arsye pse politikanët të jenë të privilegjuar jenë në këtë shoqëri.
“Nuk ka arsye pse ta shtyrë në kalendat grekë këtë proces. Situata sot në Shqipëri është dramatike për shkak të revanshit të krimit ndaj institucionit dhe shtetit dhe përfshirjes së personave të lidhur me krimin drejtpërdrejt në lidhje me qeverisjen. Vullneti i PD është vullneti i cddo qytetari. ne duam të shkëpusim lidhjet e politikës me krimin, të bëjmë dekriminalizimin e zgjedhjeve dhe të bëjmë kontrollin me paketën antimafia, të cdo biznesi që ka përfituar në mënyrë të pandershme. Kështu që kërkoj të përshpejtohet ky proces, të mos bëjmë teatër me qytetarët duke thërritur në dëgjesa çfarëdo lloj marifeti vetëm për ta shtyrë dhe për ta futur në pafundësi zgjatjen dhe miratimin e vetingut të politikanëve që sot e kërkon çdo qytetar shqiptar”, deklaroi deputeti demokrat.
Salianji shtoi ndër të tjera se sot është dita kur mazhoranca duhet të kërkonte ndjesë, për ligjvënësit e futur në parlament, të cilët janë provuar për lidhje të forta me krimin. Më tej ai braktisi mbledhjen.
/b.d
