Gjergji Nika, shprehu bindjen se shumë shpejt Ervin Salianji do të shpallet “armik i partisë”, pas turit të takimeve të një grupi demokratësh.
“Unë mendoj që sot në Partinë Demokratike nuk ka demokraci. Sepse që në takimin e parë që bëri zoti Salianji filloi të sulmohej dhe të deligjitimohej. Qoftë edhe në Durrës, ku kryetarët e degës së Durrësit u dërgonin anëtarëve të tyre që mos shkonin në takim se nuk është institucional.
Çfarë institucionali duhet të jetë takimi? Zotëria është kryetar Kryesie, i zgjedhur, i komanduar, nuk ka lidhje. Ka vajtur të bëjë një takim me demokratët. As nuk shau, as nuk fyeu. Është një takim që bëhet normalisht për të ringjitur Partinë Demokratike. Unë nuk shoh ndonjë gjë të keqe. Jo vetëm Salianji, por kushdo mund ta bëjë atë lloj takimi”, deklaroi Nika në një lidhje direkte me studion e “Puls” nga Bruna Çifligu, në A2CNN.
“Lidershipi nuk nuk i do këto takime se nuk do zëra kundër. Zërat kundër nuk i do. Lidershipi bazohet në atë enturazhin 12-15 veta që janë deputetë, që nuk e njohin terrenin, ose më saktë nuk i njohin ndryshimet që ka pësuar terreni sepse mund ta njohin terrenin para 10 vjetësh, 12 vjetësh, 15 vjetësh… Po të shikosh, në qarqe deputetët nuk janë lokalisht, shumë pak janë lokalë, të gjithë rrinë në Tiranë. Patjetër nuk mund të ketë takime paralele, por në këtë situatë që gjendet Partia Demokratike është e nevojshme të bëjnë këto takime për të ngritur një frymë, për të bërë diçka ndryshe”, shtoi Nika.
Sipas tij, duhen vite të tëra për të krijuar një lider.
“Lider është një fjalë shumë e madhe, që është përtej iniciativave personale. Unë mendoj që Salianji po bën takime, por nuk e mendoj që Salianji të ketë forcën për të marrë lidershipin e Partisë Demokratike. Të shikojmë në takimin e radhës që Salianji do bëjë. Ne duhet të rregullojmë njëherë shtëpinë tonë, pastaj të mendojmë të rregullojmë Shqipërinë. Sali Berisha ka nisur ta bëjë, por e bëri dhe në 2021 dhe dështoi. Ne nuk mund të bëjmë eksperimente çdo katër vjet, duhet ndryshuar strategjia.
Kjo që është nisur sot është bërë dhe më përpara dhe rezultatin e ka të njëjtë. Nuk mund të bëjmë dy herë të njëjtën gjë që na sjell të njëjtin rezultat. Unë e kam shumë të qartë finalen. Do shikojmë në janar që foltorja do vijë duke u shuar, njësoj si ato protestat që në fillim kishin 5000, 10 000 dhe unë mendoj që edhe zoti Salianji, duke pasur parasysh që në Partinë Demokratike nuk ka demokraci, do ta izolojnë, do ta bllokojnë, do ta anatemojnë aq shumë, dhe shumë shpejt besoj se do shpallet edhe armik i partisë. Ka ndodhur edhe më përpara. Kemi rastin konkret të zotit Basha.
Zoti Basha nga 2021-shin deri në 2023, 2024, i Partisë Demokratike ishte, pavarësisht si vajtën gjërat, atëherë e goditën, e sulmuan, e baltosën aq shumë, saqë krijuan një mllef te njerëzit që çdo gjë ishte reale. Të njëjtën gjë do fillojnë ta bëjnë prapë. Makineria e baltës do fillojë punën që ta baltosë aq shumë edhe Salianjin dhe Alimehmetin saqë do krijojë një urrejtje te njerëzit sepse është një strukturë e tërë që funksionon në këtë mënyrë”, u shpreh Gjergji Nika.
