Ish-deputeti i Partisë Demokratike, Ervin Salianji, mendon se Sali Berisha nuk është i pazëvendësueshëm në këtë forcë politike.
I ftuar në studion e “Përballë Lajmit”, në Klan News, me gazetarin Besard Jacaj, Salianji u shpreh se në zgjedhje brenda partisë, ai do ta mundte Berishën.
Sipas tij, kryedemokrati aktual ndodhet në të njëjtat kushte politike siç ishte dhe Lulzim Basha në vitin 2021, gjë që siç shprehet ai ka sjellë një dëshpërim të thellë tek demokratët.
“Padiskutim, do e mundja me një rezultat të thellë. Harrojnë një gjë. Zoti Berisha është në kushtet që ndodhej Lulzim Basha në 2021. Pra, i ka futur në një deshpërim të thellë demokratët dhe shoqërinë e po mban peng opozitën duke uzurpuar opozitën. Ka kosto të mëdha. Pavarësisht këtij dominimi që ju thoni, që thuhet në skenën politike prej 30 vitesh, në vitin 2021 zoti Berisha ka marrë 5 mijë e 800 vota. Sa Ori Nebiaj, ajo ka marrë pak më shumë. Pra, aty ku votohet, aty është matësja. Unë këtë them. Një nga pikat e programit është kjo, të hapim listat 100% dhe t’i zgjedhin deputetët qytetarët, mos t’i zgjedhi kryetari i partisë”, u shpreh ai.
Po kështu, për Salianjin, Partia Demokratike e ka të pamundur të vijë në pushtet për shkak të Berishës. Një ndër shkaqet, është shpallja non-grata e kryedemokratit nga Shtetet e Bashkuara të Amerikës.
“Unë besoj ate që kam thënë në 2021, që zoti Berisha nuk e sjell dot Partinë Demokratike në pushtet edhe për shkak se është shpallur non-grata nga Shtetet e Bashkuara të Amerikës. Unë besoj këtë gjë… kam besuar këtë gjë, ose i jam bashkangjitur le të themi shumicës demokrateve, që zoti Berisha tha unë do ta heq non-gratën, që tha unë do i rregulloj marrëdhëniet me ndërkombëtarët , ndërkohë sot në Partinë Demokratike, për shkak të zotit Berisha, nuk hyn asnjë ambasador, as hyn as del. Zero”, tha ai.
