Zjarri i përmasave të mëdha që preku një pallat 12-katësh ditën e djeshme në Tiranë ishte fokusi i bisedës së sotme, më 15 prill, në emisionin “Rudina” në Tv Klan.
Operacioni i shuarjes së zjarrit, i cili u vu nën kontroll pas disa orësh për shkak të përmasave që mori, shkaktoi asfiksimin e disa personave, të cilët fatmirësisht morën në mënyrë të menjëhershme ndihmën e parë. Flakët gjithashtu shkaktuan djegien e 30 apartamenteve.
Drejtori i përgjithshëm i mbrojtjes nga zjarri dhe shpëtimi, Arben Cara, pohoi se shkaku i zjarrit ishte prej një biznesi në katin e parë të ndërtesës e që më pas u përhap në një pjesë të konsiderueshme të pallatit në zonën e “Farmacisë 10” në Tiranë.
Ai u shpreh se shërbimi zjarrfikës reagoi direkt sapo mori njoftimin, edhe pse pengesat si trafiku i rënduar në atë orë të pasdites apo depërtimi më afër ndërtesës për shkak të parkimit të gabuar vonuan pak më shumë procesin e menaxhimit të flakëve.
“Zjarri përparon në këto raste, pasi fillimisht vëmendja është tek njerëzit, evakuimi i tyre, i cili është bërë në një kohë rekord nga strukturat e shërbimit zjarrfikës… arritja me sukses e prerjes së vijës së zjarrit ka shpëtuar rreth 80% të kompleksit, gjë që bëri që shumë familje të gëzojnë të drejtën e pronës së tyre”, pohoi Cara.
Nga ana tjetër, Eglent Bici, sipërmarrës në tregun e pasurive të paluajtshme, u shpreh se disa nga materialet e përdorura rëndom në shumë ndërtesa në Shqipëri janë materiale që nuk përdoren më në Bashkimin Evropian.
“Kontrollet nuk bëhen me aq detaje teknike sa duhen bërë. Edhe investitorët dhe ndërtuesit duhet të jenë koshientë që patjetër duhet të bëjnë para, se në fund biznesi bëhet për të fituar para, por jo aty ku ti mund të rrezikosh jetë njerëzish. Siguria duhet të jetë prioritet, pra me sigurinë nuk duhet ceduar fare!”, theksoi Bici.
Bici gjithashtu theksoi rëndësinë e specifikimeve teknike në kontratat e blerjes së banesave, pasi këto specifikime reduktojnë “kokëdhembje” në raste të tilla të ngjarjeve të paparashikueshme si zjarret.
