Sulmuesi i Liverpool-it, Mohamed Salah, ka kritikuar UEFA-n për mënyrën se si i bëri homazh futbollistit të ndjerë palestinez, Suleiman al-Obeid, i njohur si “Peleja palestinez“, pasi organizata europiane e futbollit nuk përmendi rrethanat e vrasjes së tij këtë javë.
Federata Palestinase e Futbollit tha se Al-Obeid, 41 vjeç, u vra nga një sulm izraelit ndaj civilëve që prisnin ndihma humanitare në Rripin jugor të Gazës, të mërkurën.
Në një postim të shkurtër në platformën X, UEFA e quajti ish-lojtarin e kombëtares palestineze “një talent që i dha shpresë mijëra fëmijëve, edhe në kohët më të errëta”.
Salah reagoi të shtunën duke shkruar: “A mund të na tregoni se si vdiq, ku dhe pse?”
Duke folur për Al Jazeera, Bassil Mikdadi, themeluesi i faqes Football Palestine, tha se nuk e pret që UEFA të reagojë ndaj kritikave.
“UEFA nuk ka bërë asnjë reagim tjetër, dhe sinqerisht, do të habitesha nëse do ta bënte,” tha ai, duke përmendur “heshtjen totale” të botës së futbollit dhe organizatave të lojtarëve që nga fillimi i luftës në Gaza.
Madje edhe homazhi i UEFA-s për al-Obeidin “ishte një surprizë”, tha Mikdadi.
“Suleiman al-Obeid nuk është futbollisti i parë palestinez që ka humbur jetën në këtë gjenocid. Janë mbi 400, por ai është padyshim figura më e njohur deri më tani.”
Salah, i cili është një nga yjet më të mëdhenj të Premier League, ka bërë thirrje më parë që ndihmat humanitare të lejohen të hyjnë në Gaza gjatë kësaj lufte pothuajse dyvjeçare. Megjithatë, disa komentues që iu përgjigjën postimit të tij e pyetën pse i është dashur kaq shumë kohë të reagojë ndaj luftës gjenocidale të Izraelit.
Kombet e Bashkuara kanë deklaruar se mbi 1 mijë persona janë vrarë pranë zonave të shpërndarjes së ndihmave dhe karvanëve humanitarë në Gaza, që prej fillimit të sistemit të ri të shpërndarjes së ndihmave me GHF-në (organizata e mbështetur nga SHBA-të dhe Izraeli).
