Salah Abdeslam, njeriu më i kërkuar në Europë pas sulmeve terroriste në Paris, mendohet të jetë në Molenbeek të Belgjikës, i frikësuar për atë çka ndodhi të premten e kaluar.
Edhe pse vendndodhja e tij është mister, dikush betohet se e ka parë dhe takuar personalisht në Molenbeek të martën, katër ditë pas sulmeve.
Që Salah shkoi fillimisht në Belgjikë kjo tani është zyrtare, pasi ai u ndalua në kufi në postbllokun e policisë. Duke mos pasur ende sinjalizime nga Parisi, policët e lanë të kalonte, pas dhjetë minutave komunikim në radio.
Një person anonim ka deklaruar për SudPresse se Salah është në Molenbeek, aty ku është rritur, bashkë me vëllain e vetëvrarë në Paris, Brahimin. Personi i lartpërmendur thotë se e takoi Salahun. “Më tha se e ndihej i mbaruar dhe se e kishin tepruar jashtë mase, por kishte frikë të dorëzohej sepse mund të kishte pasoja për familjen”. Vëllait Mohamed, të arrestuar e pastaj të liruar pasi nuk kishte lidhje me ngjarjen, i ka dërguar një mesazh: Qëndro larg xhihadit.
Ndërkohë, nga Spanja thuhet se ai ka ndryshuar identitet e pamje, duke nxjerrë edhe një fotografi se si mund të duket tani.