Safet Bajri, i cili po qëndron në Bllokun e Sigurisë pas arrestimit mesditën e të premtes, do të dalë të dielën përballë Gjykatës së Posaçme.
Bashkë me të, për verifikimin e masës dhe marrjen në pyetje do të dalin edhe Behar Bajri e Astmer Bilali, dy të fundit në qeli që prej 2 vitesh në kuadër të dosjes së njohur për publikun si “Metamorfoza”.
Të tre ata akuzohen nga SPAK se kanë organizuar dhe kryer vrasjen e Fatbardh Licit, ngjarje e ndodhur në gusht të 2018-ës në Shkodër.
Prokuroria e Posaçme sqaroi në një komunikim zyrtar se kishte arritur të dokumentonte që vrasja e Fatbardh Licit, ishte organizuar pasi Behar Bajri bënte përgjegjës, Ibrahim Licin, nipin e Fatbardhit për vrasjen e ish-policit Boran Bërçana dhe të gruas së tij.
Dy të fundit u vranë në makinë në sy të fëmijës së tyre të mitur në korrik të po atij viti dhe ishin njohje e ngushtë e Bajrit.
Një seri vrasjesh u konsideruan prej vitesh në kryeqendrën e veriut si pasojë e përplasjes së dy familjeve Bajri e Lici, por kjo është dosja e parë, ku hetuesit thonë se kanë prova që e dokumentojnë.
