Një gjyqtar i Gjykatës së Lartë braziliane urdhëroi sot një hetim mbi financimin e mundshëm të huaj të fushatës së kandidatit konservator Flavio Bolsonaro i cili u mund nga Luiz Inacio Lula da Silva në raundin e dytë të zgjedhjeve presidenciale të vendit.
Gjykatësi Flavio Dino përmendi gjithashtu forma të tjera të mundshme të ndërhyrjes, siç është “manipulimi” i mediave sociale nga Meta. Kompania mëmë e Facebook, WhatsApp dhe Instagram është akuzuar nga ekipi i Lulës për ndërhyrje në zgjedhje me qëllim ndikimin e votuesve në favor të kandidatit Bolsonaro.
Gjykatësi urdhëroi që hetimi të përqendrohej në “origjinën, rrjedhën dhe destinacionin e mundshëm të fondeve të huaja”, sipas një vendimi gjykate të parë nga AFP, duke vënë në dukje se kërkesa ishte bërë nga disa palë, përfshirë Presidentin Lula të Partisë së Punëtorëve.
Në mënyrë specifike, ai i bëri thirrje Policisë Federale të përcaktojë nëse Rrjeti Rockbridge, një grup konservator amerikan, “mori pjesë në negociata që synonin marrjen e mbështetjes financiare për fushatën presidenciale të Flávio Bolsonaro”, ndërsa urdhëroi një hetim mbi dyshimet për “manipulim algoritmik nga kompanitë e internetit që synonin favorizimin ose dëmtimin e kandidatëve në procesin zgjedhor brazilian”.
Ekipi i fushatës së Lulës kishte paraqitur një ankesë në gjykatën zgjedhore, gjatë periudhës midis dy raundeve të zgjedhjeve, për përfshirje të dyshuar të Metës, të cilin e akuzoi për kufizimin e shpërndarjes së përmbajtjes në platformat Instagram dhe WhatsApp.
Hetimi për një rast pastrimi parash
Kujtohet se Flavio Bolsonaro është nën hetim për pastrim parash, ndërsa ai mohon çdo veprim të paligjshëm. Siç kishte zbuluar dje, të hënën, policia i kishte kërkuar të dorëzonte pasaportat, pas një vendimi të gjyqtarit të Gjykatës së Lartë Alessandro de Moraes.
Megjithatë, ai nuk ia dorëzoi ato policisë federale brenda afatit të caktuar nga gjykata, duke rezultuar në pavlefshmërinë e dokumenteve, sipas dy burimeve me njohuri për çështjen që folën sot për Reuters.
I rizgjedhur me 52% të votave të dielën, presidenti i krahut të majtë, gjatë fushatës zgjedhore, kishte akuzuar administratën e Presidentit të SHBA-së Donald Trump se po përpiqej të ndërhynte në zgjedhje.
Dje, të hënën, Trump i përshkroi zgjedhjet presidenciale në Brazil si “të manipuluara”, ndërsa pjesa më e madhe e bashkësisë ndërkombëtare e uroi Lulën për rizgjedhjen e tij.
The post Brazil, hetim mbi financimin e huaj të fushatës së Bolsonaros appeared first on Euronews Albania.
Burimi: Botë
