Kryetari i Gjykatës së Lartë, Sokol Sadushi, ka përcjellë një mesazh me rastin e Ditës Kombëtare të Drejtësisë, duke uruar të gjithë gjyqtarët dhe profesionistët e sistemit të drejtësisë, ndërsa ka theksuar rëndësinë e besimit publik, integritetit dhe përgjegjësisë morale në ushtrimin e drejtësisë.
Në mesazhin e tij, kreu i Gjykatës së Lartë e cilëson këtë ditë jo vetëm si një moment institucional, por edhe si një ftesë për reflektim mbi rolin që ka drejtësia në një shoqëri demokratike dhe mbi përgjegjësinë e gjyqtarëve në mbrojtjen e të drejtave dhe lirive të qytetarëve.
Sipas tij, drejtësia kërkon dije, paanshmëri, integritet dhe kurajë profesionale, ndërsa çdo vendim gjyqësor ndikon drejtpërdrejt në jetën e qytetarëve dhe në besimin ndaj shtetit të së drejtës.
Mesazhi i Kryetarit të Gjykatës së Lartë:
Në Ditën Kombëtare të Drejtësisë, dëshiroj t’u përcjell urimet më të mira të gjithë gjyqtarëve dhe profesionistëve të sistemit të drejtësisë.
Kjo ditë nuk është thjesht një moment kujtese institucionale. Ajo është edhe një ftesë për reflektim mbi peshën që mbart drejtësia në një shoqëri demokratike dhe mbi përgjegjësinë që ka çdo gjyqtar në mbrojtjen e të drejtave, lirive dhe dinjitetit të njeriut.
Drejtësia kërkon dije, integritet, paanshmëri dhe kurajë. Ajo kërkon gjyqtarë që vendosin me ndërgjegje profesionale, me respekt për ligjin dhe me vetëdijen se çdo vendim gjyqësor ndikon drejtpërdrejt në jetën e qytetarëve dhe në besimin publik tek shteti i së drejtës.
Por besimi i publikut nuk mund të kërkohet vetëm nga jashtë. Ai duhet parë, së pari, nga vetja jonë: nga mënyra si punojmë, si arsyetojmë, si sillemi, si komunikojmë dhe si e përmbushim çdo ditë detyrën. Drejtësia fiton autoritet kur gjyqtari është i gatshëm të shohë me ndershmëri edhe përgjegjësinë e vet, të korrigjojë mangësitë, të shmangë formalizmin dhe të vendosë qytetarin në qendër të shërbimit gjyqësor.
Besimi ndërtohet çdo ditë, përmes vendimeve të arsyetuara, sjelljes së paanshme, transparencës institucionale, respektit për qytetarin dhe gatishmërisë për të mbajtur përgjegjësi. Ky besim është një kapital i pazëvendësueshëm për drejtësinë dhe duhet merituar në çdo çështje, në çdo seancë dhe në çdo marrëdhënie të sistemit me qytetarin.
Në këtë ditë, shpreh mirënjohjen time për punën dhe përkushtimin e gjyqtarëve që, pavarësisht sfidave të përditshme, i shërbejnë drejtësisë me përgjegjësi dhe dinjitet.
Le të mbetet kjo ditë një kujtesë se drejtësia nuk forcohet vetëm nga ligjet dhe institucionet, por edhe nga karakteri, integriteti dhe guximi moral i atyre që e ushtrojnë atë.
Gëzuar Ditën e Drejtësisë!
