Kreu i Shkollës së Magjistraturës, Sokol Sadushi i përgjigjet Partisë Demokratike, duke mohuar të jetë ai zyrtari i lartë i drejtësisë që është takuar me pronarin e UET-së, Henri Çili.
Kandidati për gjyqtari i Kolegjit Administrativ në Gjykatën e Lartë, ku këto çështje janë në rekurs dhe presin gjykim, thotë se nëse është i vërtetë fakti që ka një takim mes Çilit dhe një drejtuesi të një organi të lartë të drejtësisë, atëherë prokuroria duhet të bëhë publik emrin e funksionarit dhe detajet e këtij takimi.
Deklaratë për media nga Sokol Sadushi
Duke marrë shkas nga përmendja e emrit tim në deklarime politike të bëra këto ditë nëpërmjet medias, ndihem i obliguar të informoj opinionin publik dhe mediatik se:
Çdo pyetje retorike e shtruar këto ditë, nëpërmjet deklarimeve politike, mediatike dhe që vë në dyshim integritetin moral e profesional, duket se ka për qëllim të dëmtojë personalitetin tim, pikërisht në këtë moment që lidhet me procedurën e nisur për kandidimin si gjyqtar i Kolegjit Administrativ në Gjykatën e Lartë.
Deklaroj me përgjegjësinë time të plotë se, me Z. Henri Çili prej shumë kohësh nuk kam pasur asnjë komunikim të drejtpërdrejtë apo të tërthortë, në ambiente publike apo private, për asnjë çështje, përfshirë ato që implikojnë personalitetin tim dhe, për më tepër, që lidhen me çështje gjyqësore penale.
Çdo deklarim i bërë ndaj personit tim mbi këtë ngjarje nuk përputhet me të vërtetën, sikurse jam i bindur se do të rezultojë në përfundim të procesit penal.
Në rrethana të tilla, kur çështja dukshëm është me interes publik, sugjeroj se nëse është i vërtetë fakti mbi takimin e realizuar me “një funksionar të lartë të drejtësisë“, do të ishte me vend që organi i prokurorisë të sqarojë opinionin publik mbi detajet e këtij takimi.
Informimi i opinionit publik i shërben, gjithashtu, ruajtjes dhe forcimit të autoritetit të pushtetit gjyqësor dhe forcon klimën e besimit në organet që ushtrojnë ndjekjen penale.
***
Ditën e sotme, Partia Demokratike bëri një reagim publik, në lidhje me operacionin ku u ndalua edhe gazetari Henri Çili.
PD nuk komentoi deklaratat e bëra nga kreu i KED dhe anëtari i Gjykatës së Lartë Ardian Dvorani, se nuk ishte takuar me gazetarin asnjëherë.
PD ngriti dyshime të tjera, duke kërkuar shpjegime nga Sokol Sadushi, aktualisht drejtor i Shkollës së Magjistraturës. Sipas PD, Sadushi duhet t`i japë fund heshtjes dhe të japë shpejgime publike për pozicionin e tij, nëse është ai personi i përgjuar me Henri Çilin.
