Armando Sadiku ka refuzuar të luajë në ndeshjen e rëndësishme të kampionatit zviceran, midis Zyrihut e Vaduzit, e vlefshme për javën e fundit. Zyrihut i duhej fitorja kundër skuadrës së sulmuesit shqiptar, të cilën e mori, por nuk arriti të mbijetonte, sepse edhe Lugano fitoi. Sadiku u tha drejtuesve të Vaduzit se nuk dëshironte të luante kundër Zyrihut, klubi që ka kartonin e tij e që e ka huazur në skuadrën nga Lihtenshtajni.
Pasi ka mësuar këtë fakt, trajneri i Shqipërisë, Gianni De Biasi, ka shprehur habinë për refuzimin, por edhe pakënaqësinë se pse ai nuk është bashkuar me kombëtaren, nëse nuk kishte ndërmend të luante.
“Nuk e dija për zgjedhjen e Sadikut. Po atëherë, pse nuk ka ardhur të stërvitet me shokët në kombëtare?”, deklaroi para ndeshjes së djeshme De Biasi për ItaSport Press.
“Armando është djalë i mirë dhe profesionist ekzemplar. Ka dëshirë e vendosmëri, por… të shohim. Një dajak herë pas here bën mirë”.
Por pakënaqësinë më të madhe trajneri e ka me sezonin pa fund në Zvicër. Kampionati u mbyll mbrëmë, të dielën është finalja e Kupës, midis dy vendeve të fundit të kampionatit, Zyrihut e Luganos. Me këtë të fundit luan mbrojtësi Frederic Veseli.
“Kjo është e pabesueshme. Të gjithë kampionatet evropiane kanë përfunduar, ndërsa Zvicra, me dhjetë skuadra, ende luan (intervista është dhënë në prag të javës së fundit). Champions League duhet të mbyllte gjithë programin futbollistit të vendeve evropiane, por unë jam ende në pritje të disa lojtarëve. E gjitha kjo sepse luajnë Lugano e Zyrihu. Do të doja të dija sikur të kishte qenë Bazeli, me siguri do të t’i kishin ndryshuar datat gjatë sezonit”, shprehet i pakënaqur trajneri i Shqipërisë.
ItaSportPress/d.i.
