Nga Artur Ajazi
Situata më e fundit në shkallë vendi, e rendit dhe qetësisë, dhe jo vetëm, mendoj se e ka shpjegimin e vet. Eshtë pikërisht ajo, që ka 30 e ca vjet që nxit rrëmujat, zjarret, mosbindjen civile, është ajo që shtyn drejt vetëgjyqësisë njerëzit e dobët dhe pastaj del dhe i “mbron”, është politika destruktive. Ajo po mbjell pashpresën, mosbesimin, pesimizmin, po tjetërson mëndjet e njerzve, po premton “shtatorë dhe dhjetorë”, është pjesa më e qelbur e politikës aktuale që po mban peng partitë e tyre, apo dhe mbështetësit tuafë, që i besojnë akoma. Duket sikur në gjithë vendin, ekziston frika dhe paniku nga krimet e momentit, por harrojmë që nxitja vjen edhe nga thirrjet e politikës destruktive.
“Qeveria e poshtër, kryeministri i poshtër, prisni deri në vjeshtë dhe populli do t’ju hedhë në Lanë”, apo dhe thirrjet nga politika e rrëmujës për “mosbindje civile”, janë skenarë të pastër për të rritur armiqësinë mes shqiptarëve. Ka skenarë të mirëmenduar nga ata, që dikur u shisnin naftën tankteve serbe dhe sot çirren për “prekjen e sigurisë kombëtare”. Ka plane të detajuara mirë nga “ustai” i rrëmujave dhe shkatërrimeve, për ti futur sërish shqiptarët në armiqësi. Kudo që ndodh një krim, natyrisht ndodh jo vetëm nga armët e depove që hapi “ustai” në 1997, por edhe sepse ai po nxit çdo ditë, me premtimet dhe thirrjet e tij, turmat të mos binden, dhe të shkatërrojnë ç’ka është bërë deri sot nga qeveria e Edi Ramës. Zëra dhe figura të tilla, duhen ndalur. Dhe për ta bërë këtë, ka 1001 mënyra dhe forma.
Askush që merret me politikë, nuk ka të drejtën morale dhe ligjore të nxisë akte dhune, dhe kjo është logjike për cilindo. Por në Shqipëri, ky fenomen ndodh ditën me diell, mes Tiranës dhe sallave të Partisë Demokratike, apo dhe në takimet e ish-liderit me demokratikasit e mbetur. Hapja e negociatave me Bashkimin Europian, e kushtëzon vendin të ndalojë zëra të tillë, e kushtëzon edhe drejtësinë e re, të ndalet seriozisht dhe të merret me kameleonët e të shkuarës. Askush nuk mund të njollosë, dhe bëjë me baltën e tij, të ardhmen e vendit, të shqiptarëve. Askush nuk duhet toleruar, tek nxit turmat, tek paralajmëron shtetin dhe strukturat e ligjshme se “do t’ju bëjmë të pendoheni nëse merreni me ne”. Ky është banditizëm politik. Një vend, anëtar i NATO-s dhe aspirant i BE-së, nuk mund të lejojë askënd të hiqet si “cub” majë selisë të partisë, edhe pse është shpallur “non-grata” apo edhe pse koha e tij ka mbaruar. Shqipëria duhet ti thotë “NDAL” bishave të tilla politike, përmes strukturave të reja të një drejtësie të pavarur, për ti kthyer njerzve qetësinë mendore dhe fizike, dhe normalizuar jetën e tyre, ndryshe do të kemi sërish skena dhune dhe tmerri, të cilat na kujtojnë të shkuarën e frikshme.
