Mbylljet e qeverisë në SHBA po bëhen gjithnjë e më të zakonshme, me mandatin e parë presidencial të Donald Trump që shënoi tre raste të tilla. Kjo përfshiu mbylljen më të gjatë në historinë amerikane, e cila zgjati 35 ditë.
Para Trump-it, ishte Bill Clinton ai që mbante rekordin e mëparshëm, me një mbyllje prej 21 ditësh në vitin 1995, kur ishte drejt fundit të mandatit të tij të parë si president. Republikanët kishin marrë kontrollin e Dhomës së Përfaqësuesve dhe të Senatit në mes të mandatit të parë të Clinton-it dhe kërkonin të miratonin një buxhet që, ndër të tjera, kufizonte shpenzimet për mjekësinë “Medicare”.
Po ashtu, Barack Obama u përball me një mbyllje 16-ditore në vitin 2013, për shkak të legjislacionit për kujdesin shëndetësor që propozoi në atë kohë.
Ronald Reagan pati më shumë mbyllje gjatë presidencës së tij, me tetë të tilla të regjistruara gjatë dy mandateve të tij në vitet 1980. Megjithatë, të gjitha ishin relativisht të shkurtra, pasi ndërprerja më e gjatë e financimit zgjati vetëm tre ditë.
Sa mund të kushtojë mbyllja e qeverisë?
Mbyllja e qeverisë federale do të thotë që qindra mijëra punonjës federalë do të jenë të pezulluar nga puna përkohësisht ndërsa të tjerët që konsiderohen si të domosdoshëm do të duhet të vazhdojnë të paraqiten në punë, megjithëse shumë prej tyre nuk do të paguhen deri sa të përfundojë kjo bllokadë.
Një letër e publikuar nga drejtori i Zyrës së Buxhetit të Kongresit, para mbylljes, jep më shumë detaje mbi pasojat financiare të mundshme.
Në letrën e Phillip Swagel, zyra vlerëson se 750 mijë punonjës federalë mund të jenë në pushim të detyruar çdo ditë, me një kosto totale ditore prej rreth 400 milionë dollarësh. Letra shton se ky numër i parashikuar i punonjësve që do të jenë në pushim të detyruar mund të ndryshojë çdo ditë, pasi disa agjenci mund të pushojnë më shumë punonjës sa më shumë të zgjasë mbyllja, ndërsa të tjera mund të rikthejnë disa prej punonjësve të pushuar në fazën fillestare.
Anëtarët e Kongresit do të vazhdojnë të paguhen, pasi paga e tyre kërkohet nga Kushtetuta Amerikane.
Sa i përket ushtrisë, ata janë të detyruar të punojnë gjatë mbylljes, por nuk do të paguhen deri pas përfundimit të saj.
“Efektet e një mbylljeje të qeverisë mbi aktivitetin ekonomik janë të pasigurta dhe madhësia e tyre do të varet nga kohëzgjatja e mbylljes dhe nga vendimet e marra nga administrata”, thuhet më tej në letër.
