Sa herë që në debatet politike shfaqet emri i Emiljano Shullazit, nga ana e opozitës vijnë një mori akuzash në adresë të Edi Ramës dhe Saimir Tahirit. Kryeministri dhe ministri i tij i brendshëm akuzohen për lidhje gjithfarësh me emrin e përfolur si një ndër personat më të frikshëm të kryeqytetit.
Këto orë Shullazi ka rënë në rrjetën e hetimeve të prokurorisë, e cila ka ngritur një numër akuzash që po e shtyjnë organin e akuzës që të kërkojë masë sigurie me burg, si hapi i parë drejt një gjykimi, i cili kësaj rradhe duket i ndryshëm nga herët e tjera. Të paktën në hapat e para të tij.
Por ndërsa hetimet avancojnë, burime të ndryshme pranë prokurorisë dhe policisë po japin disa detaje të habitshme rreth akuzave që sapo janë formuluar për Shullazin dhe bashkëpunëtorët e tij. Për shembull, thuhet se materialet lidhur me kërcënimet ndaj biznesmenit Jani Zaka janë dërguar nga policia pranë prokurorisë, dy herë, në muajt shkurt dhe mars, por hetimi nuk nisi në atë moment. Ndërkohë, sa i përket kërcënimit ndaj pedagogut Mynyr Koni, thuhet gjithashtu se prokuroria nuk e ka pranuar informacionin e politicisë para dy ditësh, por i filloi hetimet më vonë, kur kishin kaluar më shumë se 24 orë.
Hetimet e mangëta apo elemente të tjera të errëta kanë bërë që edhe në të shkuarën Emiljano Shullazi të shpëtojë nga dara e drejtësisë. Është momenti që shteti dhe institucionet e tij të rakordojnë, me qëllim që e vërteta rreth këtij personi kaq të përfolur të dalë një herë e mirë dhe që shteti të mos luajë cic-mic me rregullat dhe ligjet.
