Russia ka paraqitur një protestë zyrtare, muajin e kaluar, në Kombet e Bashkuara, kundër një zyrtari të lartë të OKB-së që kritikoi Donald Trump dhe disa politikanë europianë.
Ambasadori Vitaly Churkin iu ankua Sekretarit të Përgjithshëm të OKB-së kundër komisionerit të OKB-së për refugjatët, Zeid Ra’ad al-Hussein, që i kishte cilësuar këta politikanë si “demagogë”, citohet Express.
Kjo ndërhyrje e Rusisë në mbrojtje të kandidatit republikan për president mund të shtojë dyshimet për marrëdhënien e tij të pazakontë me diktatorin rus, Vladimir Putin. Trump ka shprehur hapur admirimin për Putinin dhe ka refuzuar të kritikojë veprimet e tij autoritare në Rusi apo ato agresive dhe provokuese jashtë vendit.
Partia Republikane ka qenë për më shumë se gjysëm shekulli zëri më i vendosur në politikën amerikane kundër ndikimit të Moskës, duke nisur që nga koha kur aty sundonin komunistët.
Në këto zgjedhje, për herë të parë, rolet janë shkëmbyer dhe Hillary Clinton është kandidatja që ka denoncuar ashpër veprimet ruse në destabilizimin e rajoneve të ndryshme të botës.
Qendrimi i butë dhe gati admirues i Donald Trump për Putinin bezdis edhe vetë republikanët. Disa udhëheqës të njohur konservatorë, përfshi edhe vetë kandidatin për zëvendës-president të Donald Trump, Mike Pence, janë përpjekur të kundërpeshojnë situatën duke e kritikuar ashpër politikën ruse.
Disa kritikë të kandidatit Trump thonë se lidhja me Rusinë është arsyeja se pse ai refuzon të botojë përmbajtjen e dokumentave të tij të taksave. Disa spekulojnë që ai është i mbytur në borxhe te bankat ruse.
Një artikull nga një ekspert i zbulimeve sekrete argumenton se Putini, në sajë të metodave të KGB-së ka identifikuar natyrën e Donald Trump dhe ka thënë në media, fjalët që e dinte që do ta ndikonin kandidatin.
Sipas tij, ekspertët e inteligjencës në SHBA nuk e shohin Trump si njeri të Putinit, po si dikush që mund të manipulohet lehtë nga ai.
Ambasadori rus në OKB ka hedhur poshtë ekzistencën e një lidhje të tillë dhe ka thënë se Rusia protestoi jo për të mbrojtur Donald Trump, por për të kërkuar paanshmëri në sjelljen e zyrtarëve të OKB-së. (b.an)
