Nga Artur Ajazi
E ndersa Edi Rama ka rritur dhe forcuar bashkëpunimin me partnerët europianë dhe ata amerikanë, në rrugëtimin drejt integrimit Shqiperisë, duket se opozita ka vendosur të mos ndryshojë asgjë nga axhenda e saj. Ajo ka thirrur në 10 Shkurt sërish një “protestë madhështore” para kryeministrisë, e bindur se, “do trondisë themelet e qeverisjes Rama”. Nisur dhe rastet e tjera, veç rreshtit të parë të “zjarrmëtarëve”, të pajisur me fishekzjarre dhe molotovë, pjesa tjeter vjen në shesh nga zori, për të përmbushur një detyrim, dhe për qerelez (osmanisht-zbatitje, gallate).
Protestat e kësaj opozite, ngjasojnë me seminaret ditore, ku mbahen ca fjalime, shfaqen video të kaluara të Berishës, dëgjohen ca thirrje “Rama ik”, dhe pastaj gjithçka degjeneron në dhunë nga adoleshentët e rreshtit të parë. Në botën e qyteteruar, protestat e opozitës bëhen ndryshe. Kanë seriozitet, kanë drejtues dinjitozë, kanë platformë dhe program demokratik, duke mos prekur asnjë “fije bari”, dhe jo të mendosh të djegin institucionet. Natyrisht këtu tek ne, organet e drejtësisë gjithmonë ndahen, kur vjen fjala dhe rradha e kunderveprimit ndaj veprave të tilla penale.
Qerelez sheh çdo shqiptar, tek dëgjon fjalimin e Berishës, tek sheh se si me urdher, në frazën e fundit të fjalimit në protestë, “nisin hedhjet e molotovëve”. Ca nga mesi protestuesve nisin dhe qeshin, ca bëjnë video, ca shohin se si Berisha nis dhe zbret shkallët e podit dhe niset nxitimthi drejt selisë, nga ku komandon përmes Mulit, “zjarrmëtarët”. Kësaj here, thonë se e kanë seriozisht “rrëzimin e qeverisjes Rama”.
Thonë gjithashtu se “do të ngujohen në shesh, do të ngrenë çadrën, dhe do ta detyrojnë kryeministrin të largohet”. Natyrisht çadra pritet të mbushet me ata që duan të shijojnë qerelezin, dikush ngre dhe “dy gishtat lart”, do porositen ca sufllaqe, pica, dhe kështu “misioni drejt pushtetit mbetet kauzë e opozitës”.
Gjithmonë në rastin kur Berisha ka vendosur të ngrejë çadrën, dhe brenda saj, të ngujojë “qëndrestarët e partisë”. Skenarët e kësaj proteste thonë burimet se “janë ndryshuar 10 herë brenda kësaj jave, pasi Berisha ndjek me vëmëndje axhendën e Ramës me nderkombetarët”. Kjo pra është opozita. E çdo ti mbajë mënd ky popull, apo dhe demokratët e mbetur tek ajo parti, kësaj “humbëtire opozitë”, që ka në gjirin e saj gërdecarët, mëkatarët, milionerët, dhe më dramatikja është se, “kërkon pushtet me çadra, molotovë, dhe dhunë”, dhe jo me votën e lirë.
