Bashkimi Ekonomik Euroazian (EEU) ka ftuar Shqipërinë dhe Maqedoninë Veriore që t’i bashkohen këtij grupimi.
Thirrja është bërë nga përfaqësuesi i Përhershëm i Rusisë në BE, Vladimir Chizhov, gjatë Forumit Ekonomik Eurasian në Verona, Itali.
“Shqipëria dhe Maqedonia e Veriut do të gjejnë mirëkuptim më shpejt në EEU sesa në BE”, theksoi diplomati rus.
Chizhov tha:
“Unë jam i sigurt se vendet, të cilat janë kandidate për anëtarësim në BE dhe së fundmi janë “vënë në akull” nga Brukseli “mund të kenë më shumë benefite në EEU.
Ftesa e Rusisë për vendet e Ballkanit për t’u anëtarësuar në EUU vjen vetëm disa ditë pas një vendimi negativ nga Presidenti Francez Emmanuel Macron.
Bjellorusia është i vetmi vend evropian që po merr pjesë në EEU.
Ndërsa Anatoli Shkareda, atashe i Ambasadës ruse në Shqipëri, i konsideroi qesharake komentet mbi përhapjen e ndikimit rus në vendin tonë.
“Këtu në Shqipëri, për fat të keq, nuk shoh as ndikim pozitiv dhe as ndikim negativ të Rusisë, përveç faktit që kemi vetëm ndikim pozitiv, në kuptimin që ndërtojmë ura bashkëpunimi në aspektin kulturor.
Për fat të keq kemi pengesa në bashkëpunimin tregtar dhe në fushën politike thuajse nuk kemi fare bashkëpunim. Ka vetëm disa takime nënkryetarësh të komisioneve ndërqeveritare, por ka shumë pengesa për shkak të mungesës së vullnetit nga ana shqiptare.
Ne e kemi të shtrirë dorën, por për fat të keq nuk ka përgjigje. Bashkëpunimin kulturor e kemi shumë të mirë, ka kërkesë nga shqiptarët që të mësojnë kulturën ruse dhe këtu ka pasur ndikim kjo kulturë, por do të kishim dëshirë që të zhvillonim më shumë edhe bashkëpunim në fushën ekonomike dhe politike. Ka turistë në rritje nga Rusia, Ukraina dhe Bjellorusia”, deklaroi Shkareda për A2.
Kur u pyet mbi shqetësimin e politikës shqiptare mbi një ndikim rus në zgjedhjet e ardhshme, me Partinë Socialiste që ka dorëzuar në Kuvend një projektrezolutë “për ndërhyrjet e huaja në proceset elektorale dhe dezinformimin në proceset demokratike kombëtare”, Shkareda tha: “Nuk është një vendim miqësor ndaj Rusisë”.
