Shqipëria së bashku me SHBA, Britaninë e Madhe, Francën, Irlandën dhe Norvegjinë kanë akuzuar Rusinë për krime lufte në Ukrainë, pasi Parisi zyrtar thotë se Vladimir Putin nuk ishte i interesuar realisht të negociojë mbi një marrëveshje paqeje.
Gjashtë vendet sfiduan Rusinë përpara një takimi të Këshillit të Sigurimit të OKB-së, ndërsa sekretarja e jashtme britanike, Liz Truss, tha se tani kishte “prova shumë, shumë të forta” të krimeve të luftës që kryheshin nga forcat ruse.
“Vladimir Putin është pas tyre,” tha Truss. “Përfundimisht është një çështje që i takon gjykatës penale ndërkombëtare të vendosë se kush është apo jo kriminel lufte dhe që ne të sjellim provat“.
Sekretari amerikan i shtetit, Antony Blinken, tha se ishte dakord me Joe Biden se krimet e luftës ishin kryer në Ukrainë, duke shtuar se ekspertët amerikanë ishin në proces të dokumentimit dhe vlerësimit të krimeve të mundshme të luftës.
Rusia ka kërkuar një tjetër mbledhje emergjente të Organizatës së Kombeve të Bashkuara për ditën e nesërme.
“Ne kemi vendosur që të mos votojmë për draft-rezolutën tonë humanitare për Ukrainën ditën e nesërme, por nuk po tërhiqemi nga ajo. Në vend të kësaj, kërkojmë një tjetër mbledhje emergjente të Këshillit të Sigurimit në mëngjes.”
Mbledhja e nesërme kërkohet nga Rusia në lidhje me laboratorët biologjikë që sipas pushtuesit “menaxhohet nga SHBA në Ukrainë.”
Deklaratat i bëri ambasadori i Moskës në Këshillin e Sigurimit Vassily Nebenzia.
Sipas raportimeve, Rusia u tërhoq nga votimi pasi nuk mundi të sigurojë aleatë që ta mbështetnin. Rusia raportohet se kërkoi nga aleatët e afërt të Këshillin e Sigurimit që të mbështetej, por nuk mori një përgjigje. Moska nuk arriti të sigurojë mbështetje nga Kina e as nga India. /m.j
