Rusia shfrytëzoi raundin e parë të bisedimeve me SHBA lidhur me fundin e luftës në Ukrainë për të kërkuar tërheqjen e trupave të NATO-s nga kahu lindor i Aleancës, duke nxitur shqetësime në kryeqytetet europiane se administrata Trump mund ta bëjë një lëshim të tillë për të vulosur marrëveshjen e paqes.
Cristian Diaconescu, shef kabineti dhe këshilltar për mbrojtjen e Presidentit rumun, deklaroi se delegacioni amerikan e kishte refuzuar kërkesën e Moskës, por se nuk ka garanci se Uashingtoni nuk do ta ndërrmarrë këtë hap.
“Me sa kuptoj unë, situata mund të ndryshojë nga ora në orë”, tha zyrtari rumun, në një referencë të kritikave të forta të Trump për liderin ukrainas dhe lëshimet e bëra ndaj Rusisë para se bisedimet të nisin.
Si pjesë e një lëvizje të tillë, do të prekej edhe Kosova me tërheqjen e trupave amerikane nga KFOR, siç pretendoi më herët gazeta Bild.
Media gjermane raportoi se Italia po përgatitet për një tërheqje të mundshme të trupave amerikane nga Kosova, si pjesë e negociatave me Rusinë, duke lënë vetëm aleatët europian në Ballkan kundër ushtrisë së fuqishme të Vuçiç.
Tërheqja e forcave të NATO-s nga ish-vendet sovjetike dhe komuniste të cilat ju bashkuan NATO-s në fund të viteve ‘90 ishte një prej kërkesave kryesore që Putin i bëri SHBA-së para se të niste luftën në Ukrainë në vitin 2022.
