Rusia ka goditur me një sulm të madh ajror kryeqytetin ukrainas, Kiev, si dhe disa rajone të tjera të vendit, duke shkaktuar të paktën një të vdekur dhe dhjetëra të plagosur, kanë njoftuar autoritetet ukrainase këtë të enjte, 14 maj.
Sipas tyre, sulmi ka ardhur pas një vale të mëparshme me qindra dronë gjatë ditës, ku u raportuan gjashtë viktima. Autoritetet në rajonin e Kievit thanë se sulmi gjatë natës ka shkatërruar ndërtesa banimi dhe infrastrukturë civile, ndërsa ekipet e emergjencës kërkojnë për të mbijetuar nën rrënoja.
Kryetari i bashkisë së Kievit, Vitali Kliçko, tha se deri tani janë shpëtuar 11 persona nga ndërtesat e dëmtuara.
Ministri i Jashtëm i Ukrainës, Andrij Sibiha, deklaroi se sulmi tregon se Rusia nuk ka synim të ndalë luftën, pavarësisht përpjekjeve për paqe të udhëhequra nga Shtetet e Bashkuara. Ai theksoi se “vetëm presioni mbi Moskën mund ta detyrojë atë të ndalë luftën” dhe shtoi se udhëheqësit e SHBA-ve dhe Kinës kanë ndikim të mjaftueshëm për të ndikuar te Vladimir Putin që t’i japë fund konfliktit.
Sulmi ka përfshirë gjithsej 675 dronë dhe 56 raketa, sipas forcave ajrore ukrainase, të cilat thanë se shumica e tyre janë rrëzuar nga mbrojtja ajrore, por janë regjistruar goditje në 24 lokacione të ndryshme.
Po ashtu, janë goditur edhe infrastruktura hekurudhore dhe portet në rajonin jugor të Odesës.
Lufta vijon prej 5 vitesh tanimë, pavarësisht përpjekjeve ndërkombëtare për paqe që deri tani kanë sjellë pak rezultate konkrete.
