Në Vlorë u zhvillua për herë të 27-të aktiviteti ndërkombëtar i sporteve ajrore “Albania Open – PGA Grand Prix”, një garë prestigjioze e hedhjes me parashutë që ka rreth 98 pilotë nga 20 shtete të botës.
Spektakli i fluturimeve dhe saktësisë në trampolinën e re pranë bypass-it të Vlorës ka sjellë emocione të veçanta për qytetarët dhe turistët e shumtë që ndjekin garën.
Kryeministri Edi Rama e ka përshëndetur organizimin e këtij eventi, duke e cilësuar si një shembull të shkëlqyer të promovimit të Shqipërisë përmes sportit dhe turizmit, ndërsa ka theksuar se Vlora po shndërrohet në një qendër të sporteve ajrore në rajon dhe ky aktivitet është një pasaportë e re për turizmin shqiptar.
Nga ana tjetër, organizatori Alket Islami, i cili prej 27 vitesh e sjell këtë spektakël në Shqipëri, ka deklaruar se gara e këtij viti ishte ndër më të fortat, ku diferenca mes vendit të parë dhe të dytë është vetëm 1 cm, duke treguar nivelin e lartë të konkurrencës.
Islami e konsideron këtë aktivitet si një mundësi të madhe për promovimin e imazhit të Shqipërisë, duke sjellë energji dhe adrenalinë në qytetin bregdetar.
Përfitimet janë të dukshme edhe në turizëm dhe ekonomi, pasi qindra vizitorë kanë mbërritur në Vlorë për të ndjekur garën, duke gjallëruar qytetin në prag të sezonit veror dhe duke i dhënë një shtysë të fortë hotelerisë dhe gastronomisë lokale.
Turneu ndërkombëtar i sporteve ajrore “Albania Open – PGA Grand Prix”, i kthyer tashmë në traditë për aeronautikën shqiptare, aktiviteti i cili zgjati katër ditë dhe kulmoi me mbrëmjen gala ku u ndanë çmimet për fituesit, u transmetua live nga RTSH.
