Rusia ndërmori një sulm masiv me raketa dhe dronë kundër Ukrainës, që goditi Kievin dhe u shtri deri në Lvivin perëndimor, ndërsa një objekt i paidentifikuar ra edhe në Poloninë fqinje. Kjo e fundit ngriti në ajër avionët luftarakë për mbrojtjen e hapësirës ajrore, teksa shpërthime të forta u raportuan në qarkun e Bilgorajt.
Sipas autoriteteve në rajonin e Lublinit, në zonë u zbulua një krater dhe mbetje të një objekti të paidentifikuar, shkruan A2 CNN.
Sulmet, që shkaktuan të paktën 8 viktima në Ukrainë, vijnë teksa presidenti Volodimir Zelenski po kthehej nga Shtetet e Bashkuara, ku presidenti Donald Trump pranoi t’i jepte Ukrainës licencën për prodhimin e raketave Patriot.
Sirenat e alarmit ranë pothuajse në të gjitha rajonet, ndërsa shpërthime të forta u dëgjuan në Kiev. Kryebashkiaku Vitali Kliçko raportoi se disa zona jorezidenciale kishin marrë flakë.
Siç bëhet e ditur, një person u vra dhe dy të tjerë u plagosën në kryeqytet, ndërsa gjashtë të tjerë, përfshirë dy fëmijë, u vranë në rajonin e Dnipropetrovskut. Një tjetër viktimë u shënua në Poltava.
Në Lviv, qytet pranë Polonisë, anëtare e NATO-s, ekipet e shpëtimit po përpiqen të nxjerrin personat e bllokuar nga rrënojat e dy pallateve të dëmtuara nga raketat ruse. Të paktën 26 persona mbetën të plagosur atje.
Ndërkohë, sulmet me dronë të Ukrainës vazhdojnë të godasin magazinat e shitësit më të madh online në Rusi, Wildberries, duke shkaktuar zjarre, të plagosur dhe dëme të mëdha ekonomike për mijëra biznese të vogla që varen nga kjo platformë.
Sipas autoriteteve ruse, gjatë natës u rrëzuan 258 dronë.
