Rusia ka në plan të ndërtojë tetë reaktorë të tjerë bërthamorë në Iran, deklaroi sot në një intervistë presidenti rus, Vladimir Putin.
“Gjithashtu Rusia synon t’i japë Iranit 2,2 miliard euro për financimin e projekteve të energjisë”, u shpreh Putin për AZERTAC, agjencia azere e lajmeve.
“Paratë janë planifikuar për të financuar ndërtimin e një termocentrali në afërsi të qytetit të Gjirit, Bandar Abbas, dhe elektrifikimin e një linje hekurudhore midis qytetit të Garmsar dhe Inceburun në veri të Iranit”, tha Putin.
“Ne gjithashtu do të ndihmojmë partnerët tanë iranianë në përmbushjen e planit të tyre të veprimit për programin bërthamor duke përfshirë përpunimin e uraniumit”, theksoi ai.
Putin do të takohet të hënën me presidentin e Iranit, Hassan Rouhani dhe presidentin e Azerbajxhanit, Ilham Alijev, në Baku.
Rusia luajti një rol kyç në ndihmën që i dha Iranit për të arritur një marrëveshje ndërkombëtare për rregullimin e programit të tij bërthamor, duke bërë që t’i hiqeshin sanksionet ndaj vendit.
Irani ka këmbëngulur se programi i tij bërthamor është paqësor, por fuqitë perëndimore, duke përfshirë Shtetet e Bashkuara dyshojnë se ajo mund të përdoret për të ndërtuar një bombë.
Më parë Rusia ka ndihmuar Teheranin të ndërtojnë centralin e saj më të madh të energjisë, në afërsi të qytetit të Bushehr.
Në vitin 2014, Rusia nënshkroi një marrëveshje për të ndërtuar dy reaktorë më shumë në objekt.
Në prill, Irani konfirmoi se ka marrë një ngarkesë të S-300 me rreze të gjatë veprimi si dhe sisteme raketash tokë-ajër nga Rusia.
Agjencia ruse e lajmeve, RIA Novosti shkruan se marrëveshja e S-300 mund të ketë qenë me vlerë rreth 900 milionë dollarë.
