Autoritetet ukrainase kanë konfirmuar se ka pasur sulme me raketa në qytetin port jugor të Odesës, ku një person mbeti i vrarë dhe u plagosën pesë të tjerë, kur një qendër tregtare dhe një depo u goditën. Presidenti i Këshillit Europian, Charles Michel, u desh të strehohej në një strehë për bomba gjatë vizitës së tij në Odesa për shkak të një sulmi raketor rus.
Të paktën 100 civilë janë ende të bllokuar brenda fabrikës së madhe të çelikut Azovstal në qytetin e Mariupol. Trupat e 44 civilëve janë gjetur në rrënojat e një ndërtese pesëkatëshe në Izyum, e cila u shkatërrua nga forcat ruse në Mars. Forcat ruse pretendojnë se kanë penguar disa përpjekje të trupave ukrainase për të rimarrë ishullin Zmiinyi në Detin e Zi. Më shumë se 50 ushtarë ukrainas u vranë gjatë përpjekjeve për t’u konsoliduar në ishull.
Këshilli i Kombeve të Bashkuara për të Drejtat e Njeriut do të mbajë një seancë speciale për Ukrainën këtë javë pasi Kievi bëri thirrje për një rishikim të situatës atje. Ndërkaq Ukraina dhe BE kanë diskutuar parandalimin e një “krize globale ushqimore” me masa të menjëhershme për të zhbllokuar portet e Ukrainës për eksportet e grurit pas bllokimit të porteve të Detit të Zi nga Rusia.
/a.r
