Vladimir Putin është i pakënaqur që, deri tani, nuk ka marrë asnjë ndjesë nga Turqia dhe as ndonjë premtim për të shlyer dëmet, pas rrëzimit të avionit luftarak.
Presidenti i Rusisë tha edhe se Turqia nuk ka dhënë asnjë siguri se fajtorët e këtij krimi do të ndëshkohen.
Marrëdhëniet e ngrohta të mëparshme midis dy vendeve u ftohën pasi Turqia rrëzoi avionin rus Su-24, i cili ishte në mision bombardimi pranë kufirit Siri-Turqi, të martën.
Rusia këmbëngul se avioni i saj nuk e dhunoi kurrë hapësirën ajrore turke, siç pretendon Turqia.
Duke folur në Kremlin, Putin tha se i vjen keq që marrëdhëniet midis Rusisë e Turqisë kanë rënë në këtë nivel.
Genadij Onishçenko, i cili ka qenë këshilltari kryesor mjekësor i Putinit, ka bërë thirrje për bojkotim të produkteve turke, për shembull domatet, pasi ato pará shkojnë direkt për financimin e fuqisë ushtarake të Turqisë.
“Të gjithë e kuptojnë se çdo domate turke e blerë në supermarket është kontribut për një tjetër raketë, e cila do të përdoret për të gjuajtur djemtë tanë. A e kuptojnë bashkatdhetarët e mi se janë ata që janë paguar për këtë raketë”, pyet Onishçenko.
