Është mbyllur në barazim 1-1 koha e rregullt e ndeshjes mes Rusisë dhe Spanjës, rezultat i fiksuar që në pjesën e parë. Vendasit nuk mundën t’i bënin ballë presionit të shpejt të Spanjës dhe në një krosim, mbrojtësi Ignashevich e dërgon topin në portën e tij pas një dyluftimi me mbrojtësin Sergio Ramos që në minutën e 12. Deri në këtë fazë të botërorit, ky është autogoli i 10 i shënuar në këtë kompeticion.
E gjendur kaq herët në disavantazh, aq më tepër ndaj Spanjës, u mendua se Rusia nuk do të arrinte të reagonte, por ndodhi e kundërta dhe vendasit shkuan disa herë rrezikshëm në portën e De Geas. Përpjekjet e tyre u shpërblyen në minutën e 41, kur arbitri akordoi një penallti për prekje me dorë në zonë nga Pique dhe Dzyuba e ktheu në gol, duke bërë që pjesa e parë të mbyllej në barazim 1-1.
Në pjesën e dytë, Spanja ishte më kërkuese, por konkretizimi në portën ruse mungoi dhe rezultati i barabartë mbeti në fuqi deri në përfundim të kohës së rregullt. Tashmë do të luhen 30 minutat e shtesës dhe në rast se nuk do të ketë gol, do të jenë penalltitë që do të vendosin skuadrën çerekfinaliste.
ma.me
