Terroristët e ISIS kanë kërcënuar sërish me sulme gjatë botërorit të futbollit që do të mbahet në Rusi vitin e ardhshëm. Përmes disa fotomontazheve të shpërndara në rrjet, shfaqen yjet e futbollit para ekzekutimit, foto të ngjashme me ato kur terroristët i kanë bërë realitet vrasjet.
Në to shfaqet montazh i Messit i shtrirë në tokë ndërkohë pranë qëndron i gjunjëzuar Neymar duke qarë teksa pret ekzekutimin nga terroristi i maskuar. Në momente të ngjashme janë publikuar edhe fotomontazhet e Cristiano Ronaldos dhe trajnerit francez Deshmps.
Fotomontazhet kanë sjellë shqetësim në Argjentinë. Zyrtarët e federatës kanë zhvilluar takime rreth sigurisë së Messit dhe yjeve të tjerë të kombëtares. Kjo pasi edhe në të shkuarën ka pasur kërcënime të ngjashme.
Ndërkohë, shqetësim ka pasur edhe për Ronaldon. Futbollisti shfaqet në fotomontazh i gjunjëzuar para terroristit që mban thikë në dorë. Në sfond duket logoja e “Rusi 2018” e shkatërruar. Eventi që mbahet vitin e ardhshëm do të jetë ndër më të ‘blinduarit’ pasi kërcënimet nga sulmet terroriste janë mëse të mundshme siaps ekspertëve të sigurisë./a.m.
