Kompania ruse për siguri kibernetike Kaspersky ka bërë të ditur se mjetet për hakim në kompjuterin e një punonjësi të NSA janë vjedhur nga një palë e panjohur. Hakeri i qeverisë amerikane, i cili humbi malwaren e NSA-s, pasi që ai kishte hakuar veten duke shkarkuar një softuer pirat, pohon Kaspersky Lab.
Kompania ruse ka hedhur poshtë akuzat se softueri i saj është përdorur për të vjedhur mjetet e hakimit të NSA-së dhe se sipas kompanisë kjo dëshmon për pafajësinë e saj.
Kaspersky Lab ka qenë në qendër të akuzave në SHBA, ku edhe është ndaluar për përdorim në qeverinë amerikane, pas raportimeve të mediave se softueri i saj mund të përdoret nga Kremlini për spiunim.
Në intervistën e tij të parë për media, pas akuzave të bëra shefi ekzekutiv i kompanisë, Eugene Kaspersky ka thënë se “është shumë e mundshme që softueri i kompanisë së tij të ketë detektuar malwaren e SHBA-së”.
Pas detektimit, Kaspersky Lab thotë se përdoruesi “duket se ka shkarkuar dhe instaluar një softuer pirat në kompjuterin e tij, që duket të ketë qenë një gjenerues i çelësit për aktivizimin ilegal të Microsoft Office, i cili ka qenë i infektuar me malware”.
Për të instaluar dhe përdorur softuer pirat, përdoruesit duhet të çaktivizojnë antivirusin në kompjuterët e tyre, ka bërë të ditur kompania, por pa mundur të konfirmojë nëse një gjë e tillë kishte ndodhur edhe rastin në fjalë.
“Përdoruesi ishte infektuar me këtë malware për një periudhë të paspecifikuar, derisa produkti ishte jo aktiv. Malware me të cilin ishte i infektuar kompjuteri i tij, kishte një “prapa derë”, e cila mund t’iu ketë lejuar palëve të treta të kenë qasje në kompjuterin e përdoruesit”, thuhet në qëndrimin e kompanisë.
Përdoruesi duket se e ka vërejtur se kompjuteri i tij ishte i infektuar dhe ka aktivizuar antivirusin Kaspersky për të kryer disa skanime, “të cilat rezultuan në detektimin e varianteve të reja dhe të panjohura të malëare të NSA”.
Kaspersky Lab thotë se në mesin e njësive të dyshimta janë identifikuar arkiva 7zip, në të cilën një analist ka gjetur se përmbajnë mostra të shumta dhe kode të sigurisë për mjetet e hakimit nga ana e NSA-së, përgatiti Telegraf. (b.an)
