Në pikat e karburanteve të rajonit jugor rus të Krasnodarit, skenat e dhunës e përleshjesh fizike janë bërë të shpeshta ditët e fundit.
Banorët e Krimesë së pushtuar nga rusët dynden çdo ditë masivisht për t’u furnizuar në Krasnodarin fqinj, pas shkatërrimit të rafinerive të tyre nga sulmet e fundit ukrainase me dronë. Kjo dyndje e paprecedentë po u shkakton vështirësi të theksuara për t’u furnizuar me naftë dhe benzinë vetë banorëve vendas të Krasnodarit. Krimeasit, veç rezervuarëve të automjeteve, mbushin edhe bidonë shtesë, duke detyruar vendasit të bëjnë vetëgjyqësi për të mbrojtur rezervat e mbetura.
Për të stabilizuar tregun, qeveria ruse ka ndaluar plotësisht eksportet e benzinës dhe ka vendosur racionim të rreptë prej 20 deri në 30 litra për mjet në zonat kufitare. Mbushja e bidonëve është shpallur rreptësisht e paligjshme, ndërsa në Krime janë bllokuar të gjitha shitjet për civilët, duke lejuar furnizimin vetëm përmes kuponëve shtetërorë, me qëllim që pjesa më e madhe e naftës të ruhet ekskluzivisht për makinerinë e luftës.
