Moska përdori sërish të njëjtën taktikë, bombardime mes bisedimeve të paqes për Ukrainën. Një breshëri prej të paktën 370 dronësh dhe 21 raketash ra mbi Kiev dhe qytete të tjerë të Ukrainës gjatë natës. Bilanci i deritanishëm, një i vrarë dhe 23 të plagosur.
Sulmi ndodhi në orët e para të kësaj të shtune, kur në Abu Dabi vazhdon për të dytën ditë, dialogu i nisur të premten, mes ukrainasve dhe rusëve, i pari ballë për ballë mes tyre në nivel ushtarak me ndërmjetësimin e Shteteve të Bashkuara, me pjesëmarrjen edhe të mikpritësve emiratas. Në fokus janë lëshimet territoriale që kërkohen nga Rusia, e cila nuk heq dorë nga rajoni i Donbasit ku ushtria ruse ka hyrë që prej vitit 2022 dhe këmbëngul që Ukraina t’ia njohë si pjesë territoriale Rusisë.
Presidenti ukrainas Volodimir Zelenski e ka refuzuar gjithmonë këtë kërkesë dhe e konsideron një kusht të panegocjueshëm. Përmes një postimi në rrjetin X, Zelenski tha se nuk duhen mbyllur sytë para këtij sulmi dhe se partnerët duhet të përmbushin premtimin për të ndihmuar Ukrainën si ushtarakisht ashtu edhe nga ana diplomatike. Ndërsa ministri i jashtëm Andrij Sibiha tha se Putin e ka vendin në Gjykatën e Hagës, e jo në bordin e paqes të Donald Trumpit.
Shtetet e Bashkuara dhe Bashkimi Evropian kanë hartuar një plan ambicioz 10-vjeçar që synon mbledhjen e 800 miliardë dollarëve nga burime publike dhe private për rindërtimin e Ukrainës pas luftës. Ky projekt parashikon jo vetëm rimëkëmbjen ekonomike, por edhe një proces të përshpejtuar për integrimin e vendit në BE, megjithëse zbatimi i tij varet plotësisht nga arritja e një armëpushimi të qëndrueshëm.
