Pep Guardiola nuk do të rinovojë kontratën me Bayern dhe në vend të tij do të vijë Carlo Ancelotti. Nuk është spekulim i medias, nga ata që ka pasur shumë çdo ditë, por pohim i kryetarit të bordit drejtues të klubit bavarez, Karl Heinz Rummenigge.
Guardiola do të mbajë një konferencë për shtyp sot në orën 13:00, ku do të njoftojë të ardhmen, por duket se Rummenigge nuk ka lënë vend për surpriza, teksa ka deklaruar për gazetën Bild largimin e spanjollit dhe ardhjen e italianit.
“I jemi mirënjohës Guardiolës për gjithçka. Me Ancelottin do të kemi një tjetër trajner të suksesshëm. Mezi po presim të punojmë së bashku”, thotë Rummenigge.
Italiani pritet të nënshkruajë kontratën trevjeçare.
Përsa i përket konferencës së Guardiolës, edhe pse largimi nga Bayern tani dihet, ajo ka interes pasi spanjolli mund të zbulojë klubin e ardhshëm. Besohet se do të jetë Manchester City, por për të janë të interesuar edhe disa klube të tjerë anglezë.
