Sekretari i Përgjithshëm i Partisë Socialiste ka komentuar sulmet e ish-kreut të LSI-së.
Gramoz Ruçi tha sot se socialistët nuk i kanë asnjë faj Ilir Metës, i cili sot i akuzon.
“Ilir Meta erdhi në Fier për të bërë pis zgjedhjet. Ne socialistët e morëm 22 vjeç pa librezë pune dhe e bëmë deputet. Pa mbushur 30 vjeç e bëmë kryeministër. Sot me votat tona e zgjodhëm president” – ka thënë sot Ruçi ndër të tjera.
Ruçi tha sot se nëse Meta shkel Kushtetutën duke mos dekretuar qeverinë e dalë nga zgjedhjet e 25 Qershorit, atëherë do përballet me shkarkimin nga Kuvendi.
““Presionet dhe shantazhet që bën me votat e socialistëve që e zgjodhën edhe president, qe nuk do të dekretoj as qeverinë, janë të kota. Nëse ka këto mend të mos e bëjë betimin në 24 korrik. Nëse do shkojë me këto mend e do shkelë kushtetutën, është burri i parë që i ka provuar të gjitha, por do të jetë edhe presidenti i parë që do të provojë shkarkimin dhe i pari që do ta firmosë do të jetë Gramoz Ruçi” – tha Ruçi referuar karrierës së Metës si Kryeministër, kryetar Kuvendi dhe President.
Përplasjet Ruçi-Meta erdhën pasi ky i fundit e akuzoi PS-në e Fierit si dhunuese të një anëtari të LSI-së.
Ilir Meta tha se Gramoz Ruçi ka ikur në 1997 i maskuar si grua për t’i shpëtuar dhunës së regjimit Berisha. Por, kreu i Grupit Socialist ka preferuar ti përgjigjet sot me një reagim të shkurtër.
/javanews/b.d
